Minister van Heydoorn di bishita na Juan P. Duarte VSBO/AGO den kuadro di Dia di Alumno
Minister van Heydoorn di bishita na Juan P. Duarte VSBO/AGO den kuadro di Dia di Alumno
Willemstad – Riba dia di Alumno, Minister di Enseñansa, Siensia, Kultura i Deporte (ESKD) sr.
Sithree van Heydoorn a bishitá e skol sekundario Juan P. Duarte vsbo/ago i felisitá e alumnonan riba
nan dia. E bishita a tuma lugá huntu ku Direktor di Skolnan Públiko sr. Reginald Römer, sr. Errol
Isabella (Tata) i Ludwig Isabella (ruman di e hóben Endrew) Isabella ku a representá e famia na ken e
dia a keda dekretá.
Endrew Isabella tabata un alumno ehemplar ku semper a sa di destaká den tur lokual ku el a hasi.
Endrew tabata un hóben ku apesar di su malesa króniko, semper a mantené perseveransha,
positivismo i determinashon. Lamentablemente Endrew a pèrde e bataya kontra su malesa 15 aña
pasá, pero te awe nos ta rekordá lokual el a nifiká. Pa e motibu akí, nos ta keda konmemor’é tur aña
di un forma speshal riba 21 di yanüari ku ta su fecha natal.
E bishita a kuminsá foi tempran kaminda Minister van Heydoorn a sera konosí ku e direktiva di e
skol i despues a pasa pa un lokalidat habrí kaminda Minister a hiba algun palabra di felisitashon i
motivashon na e alumnonan. Komo mustra di apresio a pone atenshon na e alumnonan Minister dor
di ‘pin’ e alumnonan di luna di desèmber 2021 ku a destaká na e skol. Nòmber di e alumnonan ku a
destaká ta: Katerin Serrano Figuereo, Zjareeck Poulino, Meash Joree i Giswenna Jamanica. Tambe e
konseho di alumno (leerlingenraad) a keda di ‘pin’ pa Minister komo ku kada un di e hóbenan aki ta
karga un responsabilidat ekstra na skol. Despues a sigui un rekorido kortiku den e fasilidatnan di e
skol kaminda a kombersá ku dosentenan.
Komo ku ta dia di alumno Minister S. van Heydoorn a deliberá i dialogá ku e konseho di alumno
(leerlingenraad). E alumnonan di e konseho ta Tishaina Troncon, Yaden Rosales, Marty-lion Sambo i
Brandon van der Veen. Sr. Errol Isabella (tata di Endrew Isabella) i e ruman di Endrew sr. Ludwig
Isabella tambe a kombersá i motivá e hóbennan pa sigui bai dilanti i a konta un tiki di e bida di
Endrew.
Ministerio di ESKD por mira bèk riba un mainta eksitoso i alabes ta felisitá tur alumno di Kòrsou ku e
dia akí. E mensahe importante na tur alumno riba e dia di awe ta pa nunka entregá. Sigui ku
perserveransia pa logra bo metanan, meskos ku alumno Endrew Isabella a logra su metanan apesar
di su malesa!
