Ministerio GMN a reuní ku institutonan di kuido
Ministerio GMN a reuní ku institutonan di kuido
Willemstad – Riba djaluna 24 di yanüari 2022 ministerio di GMN a sinta na mesa ku direktiva di e seis (6) diferente institutonan ku ta kai bou di Federashon di Institutonan den Kuido. Ta trata di, entre otro, Wit Gele Kruis, Birgen di Rosario, SGR Groep, Fundashon Kuido Integral Banda Bou, Thuiszorg Banda Bou i Stichting Verpleeghuizen Curaçao (Betèsda). Tur e institutonan aki ta kai bou di e mesun CAO. Huntu ku Ministerio di GMN tabata presente SVB i Ministerio di Finansa. E Institutonan di kuido a indiká ku básikamente nan tur seis tin défisit finansiero ku ta sigui empeorá debí na gastunan di personal manera “indexering” i “periodiek” kual ta hasi e situashon aun mas agudo.
Durante e reunion, representante di kada instituto, a haña oportunidat pa indiká kiko nan ta mira komo posibel solushon pa e situashon. Lokual tur e institutonan tin en komun ta ku sea e tarifa aktual, korte riba nan supsidio òf presupuesto, debe di belasting òf prima sosial a kontribuí na nan situashon aktual. Ministerio di GMN ta enfatisá ku gobièrnu ta asumí su responsabilidat pa loke ta trata kuido na komunidat, i ku pa yega na un solushon struktural mester investigá di kua forma tur e partidonan envolví por aportá. Ministerio di GMN lo reuní ku sindikato CBV tambe pa tende nan punto di bista i posibel solushon.
Durante e reunion Ministerio di GMN i e institutonan a palabrá, pa tene un “media stilte” durante e fase inisial aki i ku lo sali den publisidat ku mas informashon na momentu ku yega na un akuerdo satisfaktorio pa tur entidat.