Minister Dangui Oduber November 2022 lo tuma lugar e prome evento internacional di “Sustainable Air Transportation”
Minister Dangui Oduber
November 2022 lo tuma lugar e prome evento internacional di “Sustainable Air Transportation”
ORANJESTAD – Minister di Turismo y Salud Publico Sr. Dangui Oduber ta anuncia cu na luna di november lo bay tuma lugar e prome evento internacional di “Sustainable Air Transportation”aki na Aruba. Esaki despues cu na april di 2021 tur e 6 CEO/Managing Directors nan di e aeropuertonan den Caribe Hulandes (Dutch Caribbean Cooperation of Airports (DCCA) a firma un acuerdo pa promove transporte aereo mas sostenibel, stabil, cu tarifanan mas accesibel y mihor conexion entre e islanan di Reino Hulandes.
E evento internacional di “Sustainable Air Transportation” ta un combinacion di un seminario y un workshop y e lo tin un duracion di 1 siman. E meta di e evento internacional aki ta pa mehora e conexionnan entre e aeropuertonan di DCCA, trece un mehoracion cu ta sostenibel y crea un red di e conectividad interinsular cu ta mas accesibel pa un y tur.
Esaki lo bay stimula e turismo interinsular (island hopping tourism), stimula e mercado laboral, stimula servicio nan di cuido medico y mehora e rednan social. Tambe lo tin un presentacion riba opcionnanan di futuro pa cu transportacion alternativa, di e manera aki tur e partnernan ta keda bon informa y duna nan e oportunidad tambe pa hiba un discucion riba e diferente opcionnan cu tin pa crea un aviacion mas sostenibel.
Den e evento aki lo bay amplia riba diferente topico manera:
- E investigacion actual y e desaroyonan tecnologico mundial di future relaciona cu avacion sostenibel: electricidad y otro alternativanan den aviacion cu no ta combustibel fossiel.
- E oportunidadnan cu ta existi pa haci negoshi y retonan cu lo tin pa e aeropuertonan y aerolineanan pa ta mas sostenibel.
- Lo elabora riba e posibilidadnan cu tin y cua enfoke lo hiba pa cu transporte publico pa mehora e conexion entre e islanan.
E evento aki ta cuadra cu e maneho di Minister Dangui Oduber caminda ta sigui promove desaroyonan cu ta cuadra cu e “Sustainable Development Goals” (SDG’s). E ta na fabor di nos turismo y e lo crea mihor conexion entre e islanan di Caribe Hulandes y na un tarifa mas abou cu e ta awor. Minister Oduber ta desea DCCA tur clase di exito den nan preparacion di e evento internacional aki, sigui cu e bon trabou y compromiso cu boso tin pa cu Aruba.
