Kon Nashonnan Uní lo mira Coho? Hulanda ta midi ku 2 midí den mundu. Nos den Reino ta su sokete.

 

Kon Nashonnan Uní lo mira Coho?

Hulanda ta midi ku 2 midí den mundu. Nos den Reino ta su sokete.

 

Despues di tur e konsehonan negativo ku ‘Raad van Advies’ di Kòrsou i ‘Raad van State’ di Hulanda a duna, Kòrsou por a tuma nota ku un lei di Reino mas, e biaha aki bou di e nòmber ‘Coho’, a yega Parlamento di Kòrsou. Di otro banda sekretario di estado di Hulanda, señora A. Van Huffelen, tin masha apresio pa Kòrsou. Su deseo ta pa Kòrsou i Hulanda por traha huntu den futuro, pero no opstante di esaki, sra. Van Huffelen no a sugerí pa e paisnan den Reino eleminá e elementonan kolonial ku ketu bai ta eksistí den Statüt i akuerdonan di koperashon ku tin Statüt komo nan orígen, manera e leinan di konsenso eksistente. Solamente ora e elementonan kolonial den Statüt wòrdu eliminá, e igualdat entre e sosionan ku huntu ta forma Reino Hulandes lo bai prevalesé.

 

Den un opinion por eskrito tokante e ‘waarborgfunctie’ di artíkulo 43 di Statüt ku nan a publiká na 2011, Raad van State mes a splika ku intenshon di Statüt nunka tabata pa fortifiká asuntunan di Reino anto redusí nos outonomia. E intenshon semper tabata pa fortifiká nos outonomia anto tene asuntunan di Reino na un mínimo. Despues di 10-10-10 ta un lástima ku nos ta hasiendo lo kontrali di e intenshon di Statüt dor di bin ku mas leinan di Reino den forma di leinan di konsenso i awor ‘Coho’.

 

Den un opinion por eskrito na 2018 dirigí na Korte Internashonal di Hustisia tokante e derecho di outodeterminashon en relashon ku un kaso entre Gran Bretaña i Mauritius tokante poseshon di Islanan Chagos, Gobièrnu di Hulanda a deskribí e derecho di outodeterminashon di pueblonan komo un derecho inalienable, universal i kontinuo. Mientras ku e tin un karakter ku ta obligá bo di kumpli ku n’e. Ku e deskripshon aki Gobièrnu di Hulanda mes ta konfirmá ku e derecho di outodeterminashon di un pueblo no por ta sup ordiná na desishonnan di organonan gubermental di un otro pueblo. Leinan di konsenso i ‘Coho’ tei pa hasi e kontrali di loke Gobièrnu di Hulanda mes ta deskribí.

 

Na nos opinion Gobièrnu di Hulanda, pa medio di leinan di konsenso i ‘Coho’ ta violá artíkulo 90 di si própio konstitushon ku ta bisa: ‘Gobièrnu di Hulanda ta obligá na promové e órden hurídiko internashonal’. E último aki tin e Manifesto di Nashonnan Uní komo su fundeshi. A base di e kosehonan ku Hulanda ta duna den kasonan di otro pais nos por konfirmá ku Statüt a wòrdu kreá pa eskivá e leinan madre di Nashonnan Uní.

 

Aki pueblo di Kòrsou klaramente ta haña mas konfirmashon ku Gobièrnu di Hulanda ta midi ku dos midí, unu pa paisnan tersera anto unu pa su sosionan supuestamente igual den Reino. A yega tempu pa pone un fin na e charada aki di Gobièrnu di Hulanda.

 

A yega tempu pa Kòrsou eksigí e igualdat ku Hulanda a bende Nashonnan Uní ku ta eksistí den Reino Hulandes, esta ‘gelijkheid’ (igualdat) i no ‘gelijkwaardigheid’ (ekivalensia).

 

Pa mas informashon por tuma kontakto ku sr. Raimy Manuela (miembro di Trabou Pa Kòrsou TPK) na 523-9537.

 

This site uses Akismet to reduce spam. Learn how your comment data is processed.

%d bloggers like this: