Enkuesta na Sint Maarten bou di empresanan lokal tokante e efektonan di red tape

February 20, 2022 REDAKSHON

Enkuesta na Sint Maarten bou di empresanan lokal tokante e efektonan di red tape

WILLEMSTAD/PHILIPSBURG – Dia 21 di febrüari 2022, Centrale Bank van Curaçao en Sint Maarten
(CBCS) den kolaborashon ku St. Maarten Chamber of Commerce & Industry (COCI), lo lansa un enkuesta
online bou di empresa i otro tipo di entidat na Sint Maarten tokante e efektonan di red tape riba
prestashon empresarial i kresementu ekonómiko. E enkuesta aki ta parti di un investigashon di e
efektonan di peso atministrativo na Kòrsou i Sint Maarten.
Djaluna dia 21 di febrüari, entidatnan na Sint Maarten skohí na un manera aselekto, lo risibí un email
di CBCS su departamento di Research, invitando nan pa partisipá na e enkuesta online. E enkuesta lo
tuma aproksimadamente 10 minüt pa kaba di yen’é. CBCS ta pidi tur e entidatnan skohí pa por fabor
yena e formulario di enkuesta promé ku dia 7 di mart 2022. E enkuesta ta anónimo i tur dato i
informashon kolektá lo ser tratá na un manera estriktamente konfidensial.
Meta di e investigashon ta pa komprondé mihó ki efekto red tape tin riba sektor privá. Spesífikamente,
e investigashon ke midi loke kumplimentu ku prosedimentu i regla atministrativo ta kosta e entidatnan
na tempu i plaka. E preguntanan den e enkuesta lo ta entre otro tokante petishon di pèrmit di negoshi,
konstrukshon i empleo. CBCS a tene un enkuesta similar na Kòrsou den luna di novèmber 2021. E
intenshon di CBCS ta di publiká un rapòrt riba kuestionnan relashoná ku kumplimentu ku
prosedimentu atministrativo na Kòrsou i Sint Maarten e aña aki, den kua lo inkorporá e resultadonan
di e enkuesta akí i tambe algun rekomendashon pa mehorashon.
CBCS ke gradisí tur e entidatnan skohí di antemano pa nan partisipashon na e enkuesta.