GRUPO DI TRABOU PA KU SITUASHON NA WACAWA A TENE SU PROMÉ REUNION

GRUPO DI TRABOU PA KU SITUASHON NA WACAWA A TENE SU PROMÉ REUNION

 

Willemstad – E grupo di trabou ku a keda instalá pa Promé Minister Gilmar Pisas, pa ku e situashon ku tin na Wacawa, a tene su promé reunion dia 9 di mart 2022.

 

Manera ya a keda menshoná den un komunikado dia 6 di mart 2022, Gobièrnu di Kòrsou tin debido atenshon pa ku e situashon ku tin na Wacawa.

Dia 1 di mart a tene e promé reunion kaminda Promé Minister Gilmar Pisas huntu ku Minister di Salubridat, Medio Ambiente i Naturalesa Dorothy Pietersz-Janga i nan konseheronan, a reuní ku e Federashon Koperativanan Uní di Produkshon, Fundashon Viba, Piskadonan di Wacawa i nan konsehero.

 

Despues a sigui un di dos reunion huntu ku Defensa/Marina Real dia 4 di mart 2022.

Den e reunion aki tabata tambe presente Promé Minister Gilmar Pisas, Minister di Tráfiko, Transporte i Planifikashon Urbano Charles Cooper, Federashon Koperativanan Uní di Produkshon, Fundashon Viba, Piskadonan di Wacawa i nan konsehero, konsehero di Ministerio di Salubridat, Medio Ambiente i Naturalesa (GMN) i konseheronan di Promé Minister.

 

Durante di e reunion aki a instituí e grupo di trabou ku mester a sigui traha riba proposishonnan konkreto pa trese kambio den e situashon ku tin aktualmente na Wacawa. 

Den e grupo di trabou aki tin representashon di Federashon Koperativanan Uní di Produkshon, Defensa/Marina Real, Fundashon Viba, Piskadonan di Wacawa i nan konsehero, konseheronan di GMN i di Promé Minister.

 

Durane di e promé reunion di e grupo di trabou dia 9 di mart 2022 a yega na e siguiente akuerdonan pa por yega na un solushon a korto plaso:

  1. Defensa/Marina Real lo bini ku un skema adaptá di nan trainingnan;
  2. E Piskadonan lo bini ku un skema pa ku dia i orarionan ku ta piska;
  3. E grupo di trabou lo atendé e skemanan aki den un siguiente reunion ku ta djaluna dia 14 di mart 2022, pa por yega na un skema ku lo bai keda apliká a korto plaso. Lo sigui traha despues pa por yega na proposishon i solushonnan konkreto i definitivo.

 

E reunion a keda dirigí pa konsehero di Promé Minister sra. Roxienne Albertina.

Tur esnan presente tabata satisfecho ku e forma ku e reunion a kana, kaminda tabatin oportunidat amplio pa trese opinion i diferente proposishon dilanti.

This site uses Akismet to reduce spam. Learn how your comment data is processed.

%d bloggers like this: