Siman di Kultura 2021

 

Siman di Kultura 2021

Geplaatst op 05 September 2021 dor di Ministerio Enseñansa, Siensia, Kultura & Deporte

Di 26 di sèptèmber pa 3 di òktober ta Siman di Kultura 2021:

Konop’é, Hals’é i Traspas’é!

WILLEMSTAD – Siman di Kultura ta tuma lugá di 26 di sèptèmber pa 3 di òktober 2021. Durante di e Siman di Kultura ta pone atenshon riba Salú i Bienestar di nos pueblo den e konteksto kultural pa ku salubridat. Tema di e aña akí ta Bienestar den konteksto Kultural, ku e lema: Konop’é, Hals’é i Traspas’é.

Durante siglonan e konsepto “ Bienestar” a pasa den kambionan drástiko. Te promé ku siglo 20 tabata mira bienestar komo e ousensia di un malesa òf enfermedat.  Den e tempu ei ainda no tabata para ketu na salubridat mental òf otro aspektonan di bienestar. Ta na siglo 20 a kuminsá deskribí bienestar referiendo tantu na e salú mental komo e salú físiko. Den e sosiedat moderno akí mas i mas ta mira e kurpa humano den forma holístiko. Pa e motibu akí e konsepto bienestar a keda hinká den un bachi nobo. Si para ketu kon tabata mira e konsepto akí di un forma superfisial promé ku siglo 20, awor ta deskribí bienestar den siglo 21 komo “un estado di bienestar kompleto”. Un konsepto multidimenshonal kaminda no solamente ta aspirá pa yega na ousensia di malesa òf enfermedat, pero mas importante pa logra yega na un estilo di bida optimal i saludabel.

P’esei nos mester konopá na nos grandinan pa asina hals’é i transpas’é pa nos generashon nobo. Durante di e Siman di Kultura akí nos ta pone énfasis riba e seis dimenshonnan di Bienestar ku ta:

  1.       Bienestar i salú físiko;
  2.       Bienestar i salú sosial;
  3.       Bienestar i salú intelektual;
  4.       Bienestar i salú spiritual;
  5.       Bienestar i salú emoshonal;
  6.       Bienestar i salú profeshonal.

Gobièrnu di Kòrsou huntu ku su partnernan SEFBA, SIFMA, FDDK i JCC ke stimulá tur instansia gubernamental, sektor privá, kasnan di grandi, skolnan, sentronan pre eskolar, sentronan pro eskolar, internat, ofisinanan, seguronan i mas pa tambe partisipá aktivamente durante di Siman di Kultura 2021. Na mes momentu ta hasi un yamada na tur organisashon pa tene kuenta ku e medidanan di prekoushon pa ku COVID-19 ku ta vigente.

Den transkurso di e simannan benidero ta manda mas informashon, pero ta pidi kada siudadano pa ban konopá, halsa i traspasá nos bienstar den e konteksto kultural pa asina nos por tin un Siman di Kultura 2021 eksitoso.

 Siman di Kultura di 26 di sèptèmber pa 3 di òktober 2021.

Konop’é, Hals’é i Traspas’é!

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: