KLIENTENAN DI FUNDASHON ‘NOS TEI PA OTRO’ TA REDISKUBRÍ LUS DI BIDA DESPUES DI PANDEMIA
KLIENTENAN DI FUNDASHON ‘NOS TEI PA OTRO’ TA REDISKUBRÍ LUS DI BIDA DESPUES DI PANDEMIA
Willemstad 13 di Mart 2022- Pa mayoría di nos e pandemia a pone un peso pisá riba nos i a laga sikatrís atrás ku ta tuma tempu pa kura. Pa e klientenan di Fundashon Nos Tei pa Otro, e peso aki tabata aún mas grandi ora ku, mientras nan ta rekuperá for di nan pasado, den hopi instante nan tabata isolá debí na peliger di keda kontagiá òf pasó nan a bira malu debí na COVID. P’esei Fundashon Nos Tei pa Otro a skohe Dia Internashonal di Hende Muhé pa duna su klientenan e oportunidat pa selebrá òf redeskubrí e lus di bida, pa medio di un evento yená ku inspirashon pa sigui pa dilanti. Danki na koperashon di entre otro CIBC FirstCaribbean, e fundashon a brinda su klientenan un dia ku bèrdat a duna kontenido tambe na e tema di e dia, esta, “Kibra ku e prehuisio” (brake the bias).
Fundashon Nos Tei pa Otro ta un fundashon lantá na 1988 ku ta duna alohamentu temporal na hende muhé ku tin un pasado di adikshon òf ku a bira víktima di abusu doméstiko. Durante di nan estadia e fundashon ta prepará e klientenan pa nan por regresá bèk den komunidat komo sernan salú i independiente. Fundashon Nos Tei pa Otro ta e úniko kas na Kòrsou ku ta brinda alohamentu di un forma efektivo, ku kuido i guía, después di tabata habitá e sentro ku hendenan muhé ku un pasado di adikshon na droga.
E dia mes tabata yená ku aktividat ku a laga e klientenan yen di ánimo i kla pa bolbe kuminsá bida bèk den un normal ku poko poko nos ta kustumbrando ku’né atrobe. Despues di kuminsá e dia gradisiendo nos Ser Supremo, a sigui ku un charla inspirativo ku e tópiko “Igualdat di género awe, pa un mañan sostenibel”.
Durante di un mini-tayer, e partisipantenan a traha pinturanan riba kanvas na un forma masha kreativo, riba kua a ekspresá e tema “Kibra ku prehuisio”. E dia a keda kulminá ku un presentashon artístiko ku a inspirá e klientenan di Fundashon Nos Tei pa Otro.
E presidente di e fundashon, Sra. Sonia Baromeo, a bisa: “Tabata hopi importante pa na un forma adekuá nos duna nos klientenan e oportunidat pa laga e eksperensha di e periodo di pandemia atrás i inspirá nan pa ban awor ku fé pa dilanti. No tabata un periodo fásil pa nan, ni pa nos empleadonan. Huntu nos a sá di sobrepasá e tempunan difísil, i awe nos por fiha pa dilanti. Nos ke gradisí tambe CIBC FirstCaribbean i demás patrosinadónan pa nan sosten den esaki. Nos klientenan lo keda kòrda e dia aki pa largu tempu.”
