Grupo di trabou pa ku situashon na wacawa a tene su di dos reunion
Grupo di trabou pa ku situashon na wacawa a tene su di dos reunion
Willemstad – E grupo di trabou ku a keda instalá pa Promé Minister Gilmar Pisas, pa ku e situashon ku tin na Wacawa, a tene su di dos reunion dia 14 di mart 2022.
Den e reunion aki tabata presente representantenan di Defensa/Marina Real, Federashon Koperativanan Uní di Produkshon, Fundashon Viba, Piskadonan di Wacawa, konseheronan di e Minister di Salubridat, Medio Ambiente i Naturalesa i di Promé Minister.
Durane di e promé reunion di e grupo di trabou dia 9 di mart 2022 a yega na e siguiente akuerdonan pa por yega na un solushon a korto plaso:
- Defensa/Marina Real lo bini ku un skema adaptá di nan trainingnan;
- E Piskadonan lo bini ku un skema pa ku dia i orarionan ku ta piska;
- E grupo di trabou lo atendé e skemanan aki den un siguiente reunion ku ta djaluna dia 14 di mart 2022, pa por yega na un skema ku lo bai keda apliká a korto plaso. Lo sigui traha despues pa por yega na proposishon i solushonnan konkreto i definitivo.
Despues di e reunion di dia 9 di mart 2022 a lanta e WhatsApp group den kual a dekribí e funshon di e app aki. E app lo bai sirbi pa mantené un bon relashon i komunikashon entre Defensa/Marina Real, Piskadonan i Gobièrnu di Kòrsou relashoná ku e aktividatnan ku ta tuma lugá na Wacawa.
Den e app tin un representante di Fundashon Viba, un representante di Federashon Koperativanan Uní di Produkshon, 2 Piskadó, 3 representante di Defensa/Marina Real i dos representante di parti di Gobièrnu di Kòrsou.
Den e reunion di dia 14 di mart a atendé i studia e dos skemanan ku a keda entregá di parti Defensa/Marina Real i e Piskadonan. Tabatin oportunidat pa tur hende por a trese nan punto i proposishonnan dilanti.
E partidonan a yega huntu na un desishon a korto plaso pa ku e luna di mart 2022.
A hasi palabrashonnan konkreto pa ku kon ta bai pone tur loke a akordá den práktika.
A palabrá tambe ku di parti Defensa/Marina Real lo bai traha riba un skema adaptá awor pa ku e luna di aprel 2022 i lo sigui buska den nan planning otro adaptashonnan pa ku e lunanan restante di aña 2022.
E reunion a keda dirigí pa konsehero di Promé Minister sra. Roxienne Albertina.
Tur esnan presente tabata hopi satisfecho i kontentu ku e resultado di e reunion.
E grupo di trabou lo bini huntu despues ku risibí e skema pa ku luna di aprel 2022 serka Defensa/Marina Real.