Bena Mayó ta lansa videoclip i produkshon original titulá: Warwarú Seú
Bena Mayó ta lansa videoclip i produkshon original titulá: Warwarú Seú
Willemstad – 16 di mart 2021 ultimo e agrupashon musikal Bena Mayó a lansa riba
plataformanan di media sosial su videoclip i produkshon original nob titulá: Warwarú Seú.
Ku e produkshon i e videoklep akí, Bena Mayó ta transmití su amor pa seú, i kompartí su
vishon pa ku modernisahson di nos músika kultural. Bena Mayó ta kere firmemente ku nos
músika kultural ta un ardu prinsipal di nos kultura i identidat komo Yu di Kòrsou.
Warwarú Seú
E idea pa e komposishon akí a nase algun aña pasá durante di un marcha di seú. HPA (Hóbennan
positivo i aktivo) tabata tokando den kaya i tabatin simpatisante i fanátiko di HPA kantu di kaya
ku a ekspresá ku ta manera un horkan di ritmo, ambiente i alegria ta pasa ora nos toka den
marcha. E palabranan akí a inspirá Rendel Rosalia riba e idea di warwarú seú, i huntu ku Marvin
Snijders e idea a transformá i kulminá den un tremendo komposishon alegre i festivo.
E situashon di pandemia i lockdown ku a reina a duna mas alimento i motivashon pa trese un
seú kaminda por enfoká riba alegria, festividat, libertat i abundansia di ambiente positivo i union
den kayanan di Kòrsou. Nos no por lubidá e goso i amor ku seú semper a trese pa nos di
generashon pa generashon i mester sigui halsé i karg’é den tur tempu i den tur sirkumstansia
E areglo i produkshon di e komposishon akí tabata na enkargo di direktor musikal di Bena Mayó:
Elbert Jozefa. Klaramente pueblo lo por skucha ku Bena Mayó a sigui eksplorá i eksperimentá ku
seú. Warwarú seú tin elementonan musikal nobo kombiná ku elementonan tradishonal, asina lo
por skucha zonido tradishonal di barí, chapi i kachú i elementonan monderno manera bas, kuarta,
keyboard i tambe zonido di bras akústiko ku ta e elemento mas resien ku nos a enkorporá. E
instrumento di perkushon Cubano ‘batá’ tambe ta lusi den e komposishon tresiendo un rikesa
perkusivo den e totalidat.
Rumichel Marchena (eks Kantadó Mayó) ta e interprete prinsipal i Lady Lava tambe ta trese un
intermeso musikal sabroso ku su estilo urban úniko, esaki ta otro elemento ku ta hala atenshon
den e komposishon akí.
Videoclip
E ‘videoclip’ tabata na enkargo di Cindy Jozefa do Rego ku ta nos director kreativo i kordinadó
general. E videoclip ta konta e historia di Warwarú seú ku imahenan kolorido i nítido kapturá pa
Mauricia Pictures i Grayen Pastor. Grupo FAK (Folklóriko Ambiente kultural) i ID dance group
tabata na enkargo di koreografia i baile kombinando aspektonan di baile tradishonal i tambe
moveshonnan moderno i asina tresiendo inovashon riba e tereno di baile tambe. Henter e esfera
rònt di e videoclip akí ta pa promové inklushon di tur gremio, grupo, genero i rasa. Ora alarma
zona i e anunsio di kódigo kòrá drenta ta tur hende ta evakuá i subi kaya gosa!
Gradisimentu
Henter e tim di Bena Mayó ta yama danki na un i tur ku a hasi e produkshon akí posibel i tambe
na nos miembronan ku ta leu for di kas, ku por sierto tambe a kontribuí na e piesa. Finalmente
nos ta gradisí Prins Bernard Cultuurfonds Caribisch gebeid pa nan sosten pa por a realisá e
videoclip.
Kiko ta sigui?
Bena Mayó tin diferente produkshon den tapara kaminda Bena Mayó ta suprayá e potensial
internashonal di nos géneronan musikal outéntiko. Konektá ku nos via di Facebook i Instagram
pa asina keda bon na altura