PROMÉ MINISTER GILMAR PISAS A RISIBÍ COUNTRY DIRECTOR OF  THE UNITED NATIONS WORLD FOOD PROGRAMME (WFP)

PROMÉ MINISTER GILMAR PISAS A RISIBÍ COUNTRY DIRECTOR OF 

THE UNITED NATIONS WORLD FOOD PROGRAMME (WFP)

 

Willemstad – Promé Minister Gilmar Pisas a risibí e Country Director of the United Nations World Food Programme (WFP) sr. Regis Chapman dia 15 di mart 2022.

Sr. Regis Chapman ta bai duna guia na e “Caribbean Multi Country Office” ku su sede a kaba di keda introdusí na Barbados i Kòrsou tambe lo kai bou di e sede aki.

Durante di e bishita a entregá e kredenshalnan di e representante di WFP na Promé Minister.

 

A hiba kombersashon riba e funshon i servisionan ku WFP ta ofresé i kiko esakinan por nifiká pa Kòrsou.

E programa aki ta amplio i ta tene kuenta ku diferente área di produkshon, konsumo, agrikultura, èts.

E enfoké ta riba e parti di kapasidat nashonal i fortalisashon di resistensia.

 

WFP a hasi uso di Kòrsou den pasado pa almasená algun konteiner ku tabata destiná pa distribushon di krisis den Region.

Esaki sigur lo ta un di e kombenionan di koperashon ku Kòrsou ta deseá di por tin ku WFP, kaminda Kòrsou lo fungí komo e sentro logístiko sentral i stratégiko pa distribushon di ayudo de emergensia den kuadro di krisis i òf kalamidat den Region.

Tur esaki den konsiderashon pa ku e parti di sosten humanitario.

 

Sr. Chapman a duna di konosé ku, durante su estadia na Kòrsou, nan lo hiba kombersashonnan tambe ku e Ministerio di Desaroyo Ekonómiko (MEO), e Ministerio di Salubridat, Medio Ambiente i Naturalesa, e Base di Marina na Suffisant, i otro instansianan relevante. 

 

E kombersashonnan tabata hopi ameno i Promé Minister a enfatisá ku lo ta bon pa Kòrsou sigui mantené e bon relashon ku WFP.