EVENTO DI HISA BANDERA DI ARUBA DEDICA NA SEÑOR RUDY CROES+ TAWATA HOPI EMOCIONAL Famia di Rudy Croes a ricibi un bunita recuerdo di lider di MEP
Partido MEP,
EVENTO DI HISA BANDERA DI ARUBA DEDICA NA SEÑOR RUDY CROES+ TAWATA HOPI EMOCIONAL
Famia di Rudy Croes a ricibi un bunita recuerdo di lider di MEP
Despues di dos aña di no por a celebra manera costumber, Diahuebs 17 di maart pa 11’30 di anochi, Partido Movimento Electoral di Pueblo, MEP a cuminsa cu celebracion di Dia di Himno y Bandera na grandi un biaha mas. Un evento cu a wordo organisa pa prome biaha na maart na aña 1997 pa señor Hyacintho Rudy Croes (dfm) y su comision cu tabata tin e honor tur aña di hisa e bandera aki.
Simpatisante y cantidatonan di Partido MEP a uni e anochi aki na Cede di MEP despues di tawata na Plaza Betico Croes pa e celebracion cultural exitoso, pa asina pa mey anochi hisa e bandera di Aruba di mas grandi. Bou tononan glorioso di nos Himno ‘Aruba Dushi Tera’ acompaña pa e publico presente, e bandera a bay halto den tur su Gloria.
E aña aki, Partido MEP ta dedica e evento aki na señor Rudy Croes+ como gradicimento pa tur loke cu el a haci pa Partido MEP y pa nos pueblo en general durante hopi aña. Famia di Rudy Croes tawata presente y cu hopi emocion y alegria nan a expresa nan gratitud pa e evento dedica na nan ser stima. Lider di Partido, Señora Evelyn Wever-Croes a entrega famia un bunita recuerdo di Rudy.
Señor Hyacintho Rudy Croes+ tabata un persona cu a dedica na representa su partido y pais Aruba dignamente durante hopi aña. Di e manera aki, den presencia di su famia, Partido MEP ta gradici señor Hyacintho Rudy Croes+ pa tur su esfuerso, dedicasion y amor cu el a brinda cada un di nos. Partido MEP ta gradici tambe casa di Rudy Croes, señora Damia Arends y yiunan pa comparti e momento importante aki pa nos tur.
Lider di MEP, den su discurso e anochi aki, a felicita henter e pueblo di Aruba y a reflexiona riba retonan di e crisis di Covid especialmente cu Aruba a y ta pasando aden ainda encurashando un y tur pa tin fe pasobra cu siguridad Aruba lo sali afo un biaha mas di temponan dificil mirando e stimacion cu nos tur tin pa nos dushi Aruba. Cu union nos ta logra cosnan grandi semper.
