KOMPROMISONAN KU A SIGUI TUMA LUGÁ NA DUBAI
KOMPROMISONAN KU A SIGUI TUMA LUGÁ NA DUBAI
Willemstad – E delegashon di Gobièrnu di Kòrsou a sigui ku e siguiente kompromisonan bou di guia di Promé Minister Gilmar Pisas i huntu ku Minister di Desaroyo Ekonómiko Ruisandro Cijntje dia 29 di mart 2022.
A kuminsá e dia ku un bishita serka sr. Mohammed Klalaf Al Habtoor, yu di e fundadó, Chairman i CEO di e grupo Al Habtoor. E grupo aki ta un grupo di negoshante hopi rekonosé, respetá i importante na Dubai.
Promé Minister i sr. Mohammed Klalaf Al Habtoor a sera konosí ku otro i alabes interkambiá riba un variedat di tema di interés komun. Tambe a elaborá riba posibel oportunidatnan di invershon na Kòrsou.
E bishita aki tabata unu kaminda e grupo Al Habtoor a mustra interes pa sigui tene kontakto ku Kòrsou.
Despues Promé Minister sr. Pisas a bishitá e World Government Summit 2022 pa presensiá e seshon di “Climate Change”. Esaki tabata un seshon hopi interesante i akinan Promé Minister a topa ku e Promé Minister di Antigua i Barbuda sr. Gaston Browne.
A sigui ku un bishita na e Sheikh Zayed Grand Mosque ku ta keda na Abu Dhabi, e capital di United Arab Emirates. E ta e Mosque di mas grandi den e pais, i ta e lugá di mas importante pa hasi orashonnan diario durante “Eid”.
E delegashon di Kòrsou a haña un rekorido na e Mosque.
E tabata algu hopi impreshonante pa eksperensiá.
Mas anochi a sigui un resepshon den kuadro di “King’s Day”.
Promé Minister Gilmar Pisas a hiba un diskurso finalisando esaki ku un “toast” pa ku e kumpleaños binidero di nos Rei Willem Alexander.
E dia a kana bon i por ta satisfecho ku tur e sitanan ku a keda kristalisá.
