Despues di 2 aña ta bolbe selebrá Dia di Rei na Renaissance Mall & Rif Fort!

Despues di 2 aña ta bolbe selebrá Dia di Rei na Renaissance Mall & Rif Fort!

WILLEMSTAD – Despues di tabata ousente pa 2 aña konsekutivo, e aña aki Renaissance Mall & Rif Fort ta organisando un biaha mas, e tradishonal Dia di Rei. E selebrashon lo tuma lugá riba djárason dia 27 di Aprel. E aña aki ademas di ofresé ‘booth’ rònt di e fòntein, lo ekspandé e área di selebrashon i lo inkluí Rif Fort tambe. Ademas di e tradishonal ‘bijouterie’, joya trahá na man, artesania, obra di man i produktonan natural- e aña aki lo ofresé mata, flor, i un área di ‘Health & Fitness’.  Tambe, lo tin un área spesial pa mucha, na unda ku nan por bende kos di hunga i buki ‘segunda mano’. Di e manera aki nan ta siña for di chikí, kiko ta ser un empresario. E selebrashon Dia di Rei na Renaissance Mall & Rif Fort lo ta for di 10:00 pa 18:00.

Ta invitá tur esnan ku ta interesá pa un ‘booth’ durante selebrashon Dia di Rei na Renaissance Mall & Rif Fort pa registrá mandando un e-mail pa kfelida@curacaorenaissance.com òf dor di yama 435.5023. Por registrá te ku dia 6 di Aprel, 2022. Bendedónan di produktonan similar, lo risibí aprobashon di benta basá riba ‘first come, first serve’ esaki ta pa garantisá un mayor variashon di ‘booth’. Tene kuenta ku kantidat di ‘booth’ ta limitá. E ‘booth’ den área di mucha ta grátis i mester wòrdu manehá pa un mucha di entre 6 i 10 aña di edat, kompañá pa un adulto.