PROME MINISTER TA FELICITA HIAS CU APERTURA DI CENTRO PA COMUNIDAD
PROME MINISTER TA FELICITA HIAS CU APERTURA DI CENTRO PA COMUNIDAD
ORANJESTAD – Diamars a tuma luga apertura di “HIAS Aruba Community Center”. un centro unda personanan vulnerabel (imigrante y residente), por topa cu otro. Na e centro por ricibi sosten, adikiri conocemento y desaroya cualidadnan pa transforma den un persona mas resiliente. Na e ocasion Prome Minister Evelyn Wever – Croes a hiba palabra gradiciendo HIAS pa e sosten y colaboracion brinda na Aruba ultimo 3 añanan y tambe a felicita nan cu expansion di nan servicionan den region.
HIAS a habri nan oficina na Aruba february 2019 cu un staff di dos persona, y awor ta emplea mas di 23 persona, for di cual 90% di nan ta Arubiano. Banda di provee oportunidad di trabou, HIAS tambe ta ofrece studiantenan e oportunidad pa haya experiencia laboral, como parti di nan rekisitonan academico na un organisacion internacional. Pa cual ta gradici pa duna e studiantenan e oportunidad aki.
“Como Gobierno, nos ta hopi agradeci y aprecia e sosten, colaboracion y cooperacion cu HIAS a duna durante diferente periodo dificil. Como Isla Chikito den Desaroyo / Small Island Developing State (SIDS), Aruba ta vulnerabel riba tereno social, economico y ambiental y e pandemia a accentua e vulnerabilidad aki.” Prome Minister a sigui splica cu durante di e pandemia, HIAS Aruba tabata instrumental den brinda gobierno asistencia y sigura cu imigrantenan, ta haya acceso gratis na test y vacuna. Conhuntamente cu esfuerso di diferente otro departamento, sector y comunidad, Aruba por a habri frontera bek y ‘jumpstart’ e economia. Actualmente a traves di e cifranan di turismo, ta cautelosamente optimista cu despues di dos aña cu hopi reto, lo por recupera bek na 85% pa fin di aña.
Concluyendo Prome Minister a expresa cu a traves di e apertura di e centro pa comunidad aki na Aruba, ta celebra tambe e expansion di nan servicionan den region. Desde aña pasa HIAS a haci Aruba nan oficina central y ta fungi como hub pa provee diferente servicio y asistencia na otro paisnan manera Corsou y otro islanan den region. Finalmente Premier Wever – Croes a felicita e director sr. Yiftach Millo conhuntamente cu cada miembro di staff cu e apertura.
