Gabinete Pisas su junior partner PNP ta skùif atrobe responsabilidat di goberná i benta falta riba otro
Gabinete Pisas su junior partner PNP ta skùif atrobe responsabilidat di goberná i benta falta riba otro
Minister di Desaroyo Ekonómiko, sr. Cijntje, no ta informá su mes promé ku e duna un deklarashon.
Un biaha mas, (meskos ku e famoso “populismo”) Minister Cijntje ta bolbe papia di temanan sin informá su mes, pa hasi polítika barata. Durante un entrevista riba e tema di Damen Shipyard, Minister Cijntje a deklará ku loke el a heredá di Minister di Desaroyo Ekonómiko, sr Rhuggenaath ta algu mal negoshá i lihé lihé hasi pa ku Damen.
Si sr. Cijntje lo a informá su mes miho, e lo a sa ku sr Rhuggenaath na 2016 a reskatá CDM for di bankarota i salbá 400 kupo di trabou. Durante e periodo di gabinete Rhuggenaath, CDM Holding a kai bou di maneho di Minister Martina i Minister McWilliam. Mirando e problemanan ku e kompania tabata enfrentá entre otro pa motibu di Covid 19, Promé Minister Rhuggenaath, huntu ku su Minister di Ekonomia a negoshá direktamente ku Sekretario di Estado Knops pa haña un “garantie instrumentarium” di 20 mion dollar, di kual 19 mion tabata destiná pa yuda Damen hasi e invershonnan nesesario i asina skapa kuponan di trabou. E “deal” aki a wòrdu traspasá pa e gobièrnu nobo, di kua PNP tin e kartera di Desaroyo Ekonómiko . Durante traspaso, e tema aki a wòrdu atendé eksplísitamente ku Partido Nashonal di Pueblo, ku lo mester a finalisá e trayektoria. Lamentablemente awe ta sali na kla, ku PNP no a hasi nada ku e akuerdo aki i un aña despues pueblo di Kòrsou i e trahadónan di Damen ta mira e resultado di e maneho di PNP.
Inkapasidat di maneho ta algu ku a bira e liña di gabinete Pisas-Larmonie. Enbes di goberná i krea solushon pa e desafionan ku e tempunan difísil aki ta presentá, ta lèn patras den stul i benta falta riba otro enbes di wak nan mes.
Ta importante pa pueblo di Kòrsou mira klaramente ku ora un Minister ta papia sin base i ta hunga ku sintimentu di trahadónan humilde pa populismo i gloria personal.
Un kos ta sigur. PAR a i ta sigui lucha pa un futuro stabil pa trahadonan di Damen i komunidat di Kòrsou!
Steven Croes
