Minister Maduro a topa cu otro mandatarionan di Reino Hulandes cu ta atende IMF Spring Meetings na Washington
Minister Maduro a topa cu otro mandatarionan di Reino Hulandes cu ta atende IMF Spring Meetings na Washington
ORANJESTAD – E siman aki Minister Maduro di Finansa ta atende e IMF Spring Meetings na Washington y den cuadro di e reunionnan a topa tambe otro mandatarionan di Reino Hulandes.
Na e recepcion ofreci pa e Embahador Hulandes, sr. Haspels, Minister Maduro a cera conoci cu e Minister nobo di Hulanda encarga cu Comercio Internacional y Desaroyo di Cooperacion sra. Liesje Schreinemacher y tambe cu Minister di Finansa di Sint Maarten, sr. Ardwell Irion. Tabata un momento ameno pa e mandatarionan hoben den Reino cera conoci cu otro y combersa un rato riba e reto pa ta un mandatario hoben gobernando den e ‘era di media social.’ Un tarea cu no ta facil y cu ta exigi disciplina y curashi pa carga responsabilidad grandi na bienestar di cada Pais den Reino.
Minister Maduro a topa un rato tambe cu Minister di Finansa di Hulanda, sra Sigrid Kaag, na un encuentro informal na cas di e Director Ehecutivo pa Hulanda na Washington, sr Hilbers. E mandatario combersa un rato riba e reunionnan cu Aruba ta hiba e biaha aki den IMF Spring Meetings, den cual ta gradici IMF pa e yudansa cu Aruba a bin ta ricibi den forma di asistencia tecnico cu ta resultando den cambionan na bienestar di Aruba.
Durante e encuentro na e residencia di e Embahador Hulandes na Washington, Minister Maduro a cera conoci tambe cu e Directora General di Cooperacion Internacional pa Hulanda, sra Kitty van der Heijden, y sr Klaas Knot kende ta Presidente di De Nederlandsche Bank.
Minister Maduro a ricibi un caluroso bonbini na e residencia pa e esposa di e Embahador Hulandes, sra Bernie, kende a invita Minister Maduro pa saca un bunita potret cu nan mascota Balu, mescos cu e otro mandatarionan den Reino ta saca cu Balu como un bunita recuerdo di e bishita na e residencia y e rato pa comparti cu otro memey di IMF Spring Meetings.
