Ministerio di Husticia y Asuntonan Social: A FINALISA E CURSO DI “INTERPOL RELIEF DATABASE” EXITOSAMENTE

ORANJESTAD – Diamars cu a pasa, nuebe agente policial di tanto e Departamento Forensico; Unidad di Crimen Organisa di Cuerpo Policial di Aruba como tambe un agente di e Oficina Central di INTERPOL Aruba a finalisa e curso di “INTERPOL’s RELIEF Database” exitosamente.  E curso aki, organisa pa e oficina central di INTERPOL Aruba (NCTVI), tawata tin un duracion di dos dia y a tuma luga bou guia di dos instructor internacional for di e Oficina di Secretariado General di INTERPOL na Lyon, Francia. Ta trata di e instructornan David Counter di Merca y Jan Drapal di Republica Checa. Ambos ta forma parti di e prestigioso “Drugs Unit and Criminal Organizations Sub-Directorate” di INTERPOL.

 

Durante e curso aki e agentenan a siña traha cu e database “RELIEF” di INTERPOL. E database aki ta permiti investigadonan hudicial identifica e origen y e rutanan di  contrabando di droga comprimi den forma di bloki, mediante un analisis comparativo automatisa di marcanan di herment, logo y composicion  kimico di paketenan di droga. E database aki tambe ta warda informacion di logo i composicion kimico di tabletnan di droga manera XTC y otro tiponan di asina yama “designer drugs”.

 

Cu certificacion di e agentenan investigativo hudicial i adkisicion di e database aki, Cuerpo Policial Aruba por ta orguyoso di tin un arma adicional pa asina por continua cu e lucha contra e crimen transnacional di narcotrafico. For di Ministerio di Husticia y Asuntonan Social, ta manda palabranan di pabien na esnan cu a completa e curso aki exitosamente, asina aportando na e siguridad di pais Aruba.