Impuesto nobo pa turista ta drenta na vigor 1 di yüli 2022
Impuesto nobo pa turista ta drenta na vigor 1 di yüli 2022
![[Translate to Papiamento:]](https://i0.wp.com/bonairegov.com/fileadmin/_processed_/3/6/csm_Playa_Wayaka_2__64fa8c0255.jpeg?ssl=1 "Wayaka 2")
Wayaka 2
E ordenansa nobo pa impuesta di turista pa Boneiru huntu ku e amienda, ku a keda aprobá pa un mayoría den Konseho Insular, lo bini na vigor entrante 1 di yüli 2022. Despues ku a risibí konseho hurídiko, ta konkluí ku e proseso a kana korektamente.
E ordenansa i amienda ku ta introdusí un impuesto pa turista nobo pa Boneiru a pasa ku un mayoría di voto den Konseho Insular dia 12 di aprel último. Despues ku e ordenansa i amienda ambos a keda aprobá, a surgi pregunta tokante kon e proseso a kana, i si esaki a sosodé korektamente.
Despues di evaluashon húridiko a konkluí ku e proseso a kana korektamente. Basá riba esaki, gezaghèber komo presidente di Konseho Insular i tambe e grifir a firma e ordenansa nobo i tambe e amienda. Entre tantu e ordenansa I amienda a keda publiká, entre otro riba e wèpsait www.konsehoinsular.com. Aki por mira e ordenansa nobo bou di “Bestuurlijke stukken/Verordeningen 2022” i e amienda bou di “Bestuurlijke stukken/Amendementen 2022”. Ku e amienda a ahustá e impuesto pa bira USD 75 pa kada bishita. Pa habitantenan di islanan di anterior Antia Hulandes, i tambe mucha bou di 13 aña, e impuesto ta USD 10 pa persona pa kada bishita.
E impuesto nobo di turista ta bai na vigor dia 1 di yüli próksimo, pa bishitantenan di Boneiru. Pa turistanan ku ta bini ku barku krusero e impuesto nobo di USD 10 pa persona ta bai na vigor entrate 1 di yanuari 2023. Pa mas informashon por tuma kontakto ku ofisina di Finansas di Entidat Públiko di Boneiru, via telefon 717-5330 ekstenshon 2624 òf e-meil belasting-olb@bonairegov.com.