MINISTER COOPER TA BISHITA SEKRETARIO DI ESTADO DI MEDIA I KULTURA SRA. USLU

MINISTERIO KONSERNÍ TRÁFIKO, TRANSPORTE I PLANIFIKASHON URBANO

 

MINISTER COOPER TA BISHITA SEKRETARIO DI ESTADO DI MEDIA I KULTURA SRA. USLU

PUBLIKÁ RIBA 24 MEI 2022

Den Haag – Riba 23 di Mei 2022 Minister Cooper a hasi un bishita di trabou serka Sekretario di Estado di Media i Kultura Sra G. Uslu ku tabata akompañá pa su kolaboradónan di patrimonio (erfgoed) Sr. Robert Berkovich, Sr. Kees van Rooijen, i Sr Wouter Aalberts.

A papia entre otro riba e koperashon di trabou entre Hulanda i Kòrsou riba tereno di patrimonio mundial (erfgoed), manera entre otro desaroyo di un “Outstanding Universal Value Willemstad”.
Un dokumento asina tin komo méta pa duna tur invershonista òf kualke otro interesado un bista kiko eksáktamente nan tin ku tene kuenta kuné, i kiko nan por spera di gobièrnu ora ta trata proyéktonan den nos patrimonio mundial Willemstad.
A palabrá ku un tim di Kòrsou, asistí pa un tim di Hulanda, lo traha riba e trayékto aki. Esaki mirando ku Hulanda tin hopi eksperensia riba e materia aki pasobra den Reino Hulandes tin 12 patrimonio mundial (erfgoed), di kual 11 ta na Hulanda i 1 na Kòrsou.
Tambe Minister Charles Cooper a informá Sra. Uslu riba e plannan grandi ku ta den desaroyo den patrimonio mundial Willemstad, manera: Plasa Complex, Expanshon di Embahada Merikan, i e proyekto St. Elisabeth District di SEHOS. E último aki sigur tin su rétonan. Nos a informá Sekretario di Estado Sra. Uslu ku nos ta sostené e proyéktonan aki komo Gobièrnu.
A palabrà ku komo país nos lo traha huntu riba e raportahe periódiko na e entidat mundial na Paris UNESCO riba e tereno aki di estado i mantenshon di patrimonionan mundial den Reuno Hulandes.
Di parti di Minister Cooper, a bai mesora un invitashon na Sra. Uslu pa ta presente dia 4 di desèmber 2022 serka nos na Kòrsou pa asina presensiá selebrashon di e di 25 aña Willemstad komo Patrimonio Mundial.
Despues di esaki tantu Stichting Monumentenzorg komo Stichting Monumentenfonds a duna un splikashon di lokual kada unu ta para p’é i ta hasi komo nan funshon primordial.
Tambe e dos mandatarionan a elaborá riba e posibilidat pa hasi úso di fóndonan ku lo ta disponibel den Reino Hulandes pa restaurashon i renobashon di monumentonan. Esaki nan lo sigui desaroyá den e próksimo lunanan.
Minister Cooper a keda enkantá i positivamente sorprendí di e konosementu i apresio ku Sra. Uslu ku su tim tin pa nos patrimonio mundial Willemstad i nan interes pa yuda kaminda por, pa mantené nos riba e lista di UNESCO, komo un Patrimonio di Mundu.

      

Share this page to Telegram

This site uses Akismet to reduce spam. Learn how your comment data is processed.

%d bloggers like this: