google.com, pub-5639114718427035, DIRECT, f08c47fec0942fa0

Covid a mustra no por laga solamente esnan den salubridat solushoná e problema Edukashon i siensia konhuntamente mester traha riba desaroyo duradero di kada pais

WILLEMSTAD,- Durante e último reunion konhunto dje komishonnan di salubridat i tambe edukashon, siensia, kultura, teknologia i komunikashon di Parlatino ku a tuma lugá na La Havana, Cuba a bin bon kla padilanti ku Covid a duna mundu un bion di ehèmpel di resiliensia, pero awor edukashon i siensia mester traha konhuntamente pa mundialmente por logra desaroyonan duradero.

Ileana Morales Suárez, direktor nashonal di siensia i inovashon teknológiko dje Ministerio di salú públiko na Cuba a elaborá ampliamente na apertura dje reunion konhunto riba resiliensia di siensia i salú den e etapa post Covid-19.

El a indiká ku hopi hende a keda afektá a konsekuensha di Covid-19, dor di perdida di trabou, otronan a bai atras na entrada, komèrsio a sufri gravemente, ekonomia mundial a keda afektá, mientras e sektor di hende muhé trahadó t’esun ku tabata mas vulnerabel.

Segun sifranan disponibel, ekonomia global a konosé un redukshon promedio di 3.2%, 75 mion hende a bai resultá den pobresa ekstremo, miéntras ku sifranan ta indiká ku 80 mion hende no ta hañando e nutrishon nesesario.

Na mes momento, Covid a siña henter mundu pa saka tur desigualdat, ku tabata konsekuensha di un akumulashon di problemanan di salú, sosial, ekonómiko, klimátiko i di pobresa.

Segun Ileana Morales Suárez, pa añanan tras di otro, diferente pais a bin ta traha riba e diferente problemanan menshoná. Pero Covid a mustra ku den e diferente paisnan aki, tabatin hopi retraso pa loke ta e posibel solushon pa e problemanan, lokual lo difikultá e proseso pa alkansá e metanan fihá pa aña 2030.

A surgi redukshon den kresementu ekonomiko globalmente, pues un situashon ku ta hasi e situashon ekonómiko mundialmente muchu mas visibel. Pues Covid tabata muchu mas ku solamente un enfermedat. Covid ta un kombinashon di problemanan biológiko, sosiológiko, ekonómiko i sosial, kual ta hasi e proseso pa solushoná tur e problemanan muchu mas difisil i kompliká.

Pues  Covid a demostrá ku salú di hende ta muchu importante pa laga esaki solamente den man di esnan ku ta studiá riba e materia di salú. Pasó ta importante pa tene kuenta ku e aspekto ekonómiko tambe di e persona enkuestion. Pasó ta probá ku paisnan ku a tene kuenta ku solamente e aspekto di salú, ta esnan ku a haña nan mes den mayor problema pa por a surpasá e retonan di Covid-19.

Komo ku na Cuba, semper nan a dediká hopi atenshon na e parti sientífiko, esei a hasi e resiliensia di Cuba pa surpasá e retonan di Covid ménos difisil.

P’e motibu aki, Ileana Morales Suárez ta di opinion ku mester sigui traha firmemente i di forma konhunto ku otro pais, riba e parti di investigashonnan sientífiko di manera ku mundu lo no keda impaktá dor di otro situashonnan ku por surgi den futuro.

El a indiká ku a surgi años, promé ku a logra yega na un bakuna pa “Monkey-pox”, siendo ku durante Covid den un término relativamente kortiku por a logra yega na medikamentonan pa kombatí Covid, pero esei tabata debí na resultado di estudionan sientífiko ku ya a bin ta hasi pa años kaba.

Igualmente mester traha riba un plan di edukashon pa desaroyo. Mester bin ku entre otro un proyekto riba faktibilidat kultural den e planifikashon di desaroyo duradero.

Den e kuadro aki, ta hasiendo e preparashonnan nesesario riba e konferensha mundial di “UNESCO-MONDIACULT 2022” ku lo tuma lugá den sèptèmber próksimo na México. Miéntras ku Colombia ta preparando pa e “Kumbre Global di Edukashon 2022”, kual lo tuma lugá na Medellin den luna di òktober próksimo.

E delegashon di Parlamentarionan di Kòrsou a realisá un bishita tambe na e sentro di ingenieria genétiko i biotéknologia. Tambe nan a bishitá Capitolio Nacional, sede institushonal dje Asamblea Nacional dje Poder Popular.

 

 

 

 

 

Ramón Yung                         Maria Nita                    Juniël Carolina             David Seferina

Miembronan di Parlamento

Pa Frakshon di MFK

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: