Minister Dangui Oduber Ministerio di Salud a presenta plan nacional di prevencion na AZV pa un Aruba Saludabel

ORANJESTAD. Diaranzon mainta Minister Dangui Oduber, hunto cu coleganan di Ministerio di Salud, a bishita Algemene Zietkekosten Verzekering (AZV) pa presenta un programa di prevencion den salud na director mr. Edwin Jacobs. Esaki den cuadro di e plan nacional, unda cu prevencion ta central, cu ta e maneho di Minister Oduber pa e 4 añanan di su gobernacion.

Den e programa cu a wordo presenta, ta papia di 4 pilar.

  1. Aruba Healthy Life Style Center. Esaki lo bira un centro unda tur persona, entre edad di 18 pa 65 aña cu tin problema cu obesidad, lo wordo guia pa asina por hiba un bida mas saludabel y tambe mantene esaki. E programa lo ta uno accesibel na full comunidad, especialmente pa e personanan cu risico halto. E centro lo ta pa yuda cu guia pa nutrishon balansa y saludabel, guia pa actividad fisico y entre otro descanso y drumimento pa un estilo di bida balansa y saludabel.
  2. Jump18. Esaki ta un programa pa muchanan entre 4 y 18 aña, afilia na Horacio Oduber Hospital, na unda ta guia muchanan cu tin problema cu sobre peso pa yuda nan cambia nan manera di biba.  JUMP18 a cuminsa 18 di november di aña 2021 cu e meta pa haci un diferencia pa otronan, duna inspiracion y motivacion. JUMP18 ta consisti di un grupo di hoben Arubano cu ta profesionalnan medico, cu bao guia di un pediatra a desaroya un iniciativa pa empodera muchanan y nan mayornan pa mehora nan salud y bienestar. JUMP18 su meta ta pa yuda mayornan y muchanan biba un bida mas saludabel por medio di educacion y retando nan percepcionnan limita. Por medio di e proceso aki, e acceso ta wordo crea pa mayornan y nan muchanan bolbe descubri nan balor berdadero hunto cu un conocemento mas profundo den loke ta nutricion y salud. E plan nacional ta pa yuda e programa aki redobla e capacidad, yudando asina mas mucha pa ciclo, un cantidad di 36 en bes di 17 so.
  3. Skol Saludabel. Esaki ta un programa unda ya caba tin 10 skol na Aruba cu ta participando. Nan ta wordo guia door di Direktie Volksgezondheidzorg (DVG) seccion di juegd gezondheiszorg.
  4. Concientisacion/informacion di nutricion cu ta importante pa wordo duna na Aruba su comunidad pa hiba un bida saludabel.  Lo crea un website pa Fundacion Prevencion den Salud Aruba caminda lo centralisa informashon di tur e fundashon/programa/proyecto nan relata na prevencion di NCDs. Alabes lo duna ayudo financiero na e gruponan aki pa crea contenido educacional y  promove conscienntisacion.

 

A presenta e programa aki, relata na action 3.2 di e NCD-MAP 2020-2030, na AZV den un proyecto piloto pa asina papia over di e financiamento pa cu e  aña aki. Tambe a tuma e oportunidad pa presenta kiko e programa ta encera y con e 4 pilarnan aki lo traha pa un Aruba mas saludabel. Pa e programa por wordo financia durante e añanan di gobernacion nos dilanti, lo crea un fondo yama “Begrotingsfonds Pandemische Veerkracht en Innovatie”, esta un Fondo pa Recuperacion di e Pandemia y pa promove Innovacion. E fondo aki lo bai reemplaza e Covid insurance. Tur e entrada cu lo wordo genera lo wordo inverti bek den salubridad, entre otro den prevencion, sigui amplia e capacidad di nos ICU na nos hospital y den innovacion riba tereno di salubridad, pa asina Aruba por recupera rapidamente di e efectonan di e pandemia y ta mihor prepara pa cualkier eventualidad cu lo por presenta.

Tawata un mainta exitoso na unda Ministerio di Salud a comparti informacionan cu ta relevante pa AZV, pa asina AZV por tuma un decision si por yuda financia e proyecto piloto aki pa e prome 6 lunanan, te cu fin di aña 2022. Ta e idea cu pa aña 2023 en adelante, pa medio di e fondo, crea e financiamento , pa asina e programa aki por bira sostenibel y yuda Aruba biba un bida mas saludabel.

 

Prevencion ta central den e maneho di Minister Dangui Oduber y cu pasonan firme y concreto lo bai cambia e rumbo di traha curativo pa traha preventivo.

Share this page to Telegram

This site uses Akismet to reduce spam. Learn how your comment data is processed.

%d bloggers like this: