google.com, pub-5639114718427035, DIRECT, f08c47fec0942fa0

Trash2Cash: resultadonan a ser presenta For di recomendacionnan lo diseña e Waste Policy di Aruba

E rapport final di Trash2Cash a ser presenta diabierna ultimo. E rapport a ser compila pa e grupo diverso di 12 panelista cu tabata t’ey presente durante e evento di Pitch & Switch caminda 24 compania a presenta loke nan ta of por haci pa procesa un of mas tipo di desperdicio, asina tambe conoci como “waste streams”.

Di e presentacionnan na e Pitch & Switch e panelistanan a evalua tur e proposicionnan ricibi basa riba beneficio pa hende, planeta y prosperidad, y cu esaki a traha e raportahe cual a keda presenta.

E plataforma di Trash2Cash a ser lansa riba 22 februari 2022 door di Minister Ursell Arends, cu e promesa pa reduci, reuza of recicla desperdicio cu ta ser produci y importa na Aruba. Importante tabata pa inventarisa tur actividad y capacidad existente, pa asina marca e comienso di e proceso di diseña un Waste Policy pa Aruba. E meta principal ta pa cera dump di Parkietenbos pa fin di 2022, pa por logra esaki tin cu cuminsa na desvia e fluho di desperdicio mas pronto posibel.

Trash2Cash NO tabata un competencia; e pensamento cu participacion na e evento aki lo a conduci na cualkier contract cu gobierno ta completamente eroneo. Minister Arends a enfatisa cu gobierno no por simplemente impone un decision, contrario na pensamento di algun politico cu a expresa esaki. “E no lo ta responsabel ni realisabel, mirando cu mester tene cuenta cu actividad y capacidad actual”, Minister Arends ta opina. Pa e motibo aki tabata importante pa traha inventario di actividadnan existente, y tambe retonan cu gobierno por facilita un solucion pa nan – por ehempel legislacion manera un Waste Policy.

Den e proximo fase e stakeholdernan selecta lo participa den e diseño di e Waste Policy. E resultado final lo ta un plan di maneho di desperdicio acapara cu leynan y regulacionnan corespondente pa por tin control riba kico, cuanto, unda desperdicio ta ser colecta, hiba, y ser procesa.

Ministerio di Naturalesa ta keda enfatisa cu ningun compania di desperdicio lo ser exclui di e solucionnan proponi, ni awo ni den futuro. No lo tin faboritismo ni tampoco ningun monopolio permiti den e maneho di desperdicio.

Un danki di curason ta bai na e panelistanan pa nan contribuicion y evaluacion, y na e participantenan pa nan trabou y dedicacion, pa por a presenta nan vision y asina contribui na Aruba su meta di yega na un maneho di desperdicio sostenibel.

Share this page to Telegram

This site uses Akismet to reduce spam. Learn how your comment data is processed.

%d bloggers like this: