Gobièrnu di kòrsou A tene e di 10 reunion ku e SENTRALNAN dI SINDIKATO i VBC.
Willemstad – Promé Minister Gilmar Pisas i Minister di Desaroyo Ekonómiko Ruisandro Cijntje, na nòmber di Gobièrnu di Kòrsou, a reuní ku e tres sentralnan di sindikato i VBC dia 6 di yüni 2022 na Fòrti.
Minister di Desaroyo Sosial, Labor i Bienestar Ruthmilda larmonie-Cecilia no por tabata presente debí na otro kompromiso.
Esaki tabata e di 10 reunion ku ta tene ku e tres Sentralnan di Sindikato i Vereniging Bedrijfsleven Curaҫao (VBC).
E tres sentralnan di sindikato ta: Central General di Trahadornan di Corsow (CGTC), Sentral di Sindikatonan di Kòrsou (SSK) i Sentral Solidaridat Sindikal (SSS).
Durante di e reunion aki a trata e siguiente punto di agènda:
- Inkietut i klaridat pa ku situashon aktual na Kòrsou;
- Lei di Normering Topinkomens (12,5 %);
Promé Minister sr. Pisas i Ministe di Desaroyo Ekonómiko sr. Cijntje a duna un splikashon amplio riba kua ta e direkshon ku e Gobièrnu aktual tin i kua ta tur esfuersonan ku e Gobièrnu aktual ta hasiendo pa trese solushon pa e diferente situashonnan ku tin aktualmente na Kòrsou.
Ya tin diferente medida i desishonnan ku e Gobièrnu aktual a tuma pa por yega pronto na e solushonnan nesesario.
Promé Minister sr. Pisas a duna un splikashon amplio riba e lei di “Normering Topinkomens (12,5 %)” i kua ta e desishon i stapnan ku Gobièrnu di Kòrsou lo bai tuma.
A duna informashon riba henter e proseso, kiko mester a hasi i dikon, kua ta e status aktual i kua ta e stapnan ku Gobièrnu di Kòrsou lo bai tuma.
A palabrá huntu ku kada partido lo entregá nan pregunta i sugerensianan por eskrito, buska mas informashon i konseho adishonal, riba tur e puntonan ku a bini dilanti, pa asina yuda Gobièrnu di Kòrsou pa yega na solushonnan mas struktural i duradero.
Pa ku e parti di SER e tres Sentralnan di Sindikato tin di sinta ku otro i yega na un solushon ku lo benefisiá kada Sentral di Sindikato.
E reunion a kana den un bon esfera kaminda tabatin espasio amplio pa kada partido por a dialogá, hasi pregunta, risibí kontesta, kompartí informashon i sugerensianan ku otro riba e informashonnan ku a bini dilanti.