Prome Minister Evelyn Wever – Croes: Durante apertura di veld cu yerba artificial na Parke Curason Jaburibari, NOMBER DI E VELD A BIRA CRUYFF COURT DENZEL DUMFRIES

ORANJESTAD – Diaranson Prome Minister Evelyn Wever – Croes tabata presente na Parke Curason Jaburibari pa reapertura di “Johan Cruyff Court”. Na e ocasion a gradici Minister Endy Croes cu e bunita proyecto y e bario di Jaburibari cu e hoya di veld di yerba artificial. Ademas a cambia e nomber di e veld y a inclui e nomber di un heroe deportista local Denzel Dumfries, cu hopi hoben ta admira. Cruyff Court Denzel Dumfries a keda den miho condicion pa asina nos hobennan por practica nan deporte.

 

Na e ocasion famianan di Denzel Dumfries a expresa di ta sumamente orguyoso y contento cu a nombra e veld na su honor, cual Gobierno tambe ta sumamente orguyoso cu ne. Prome Minister a gradici Minister di Deporte señor Endy Croes tambe pa su determinacion pa ehecuta e proyecto aki.

 

“Nos conoce Minister Croes como un Minister hopi determina y un persona cu ora cu e pone su curason y su mente den algo, e ta percura pa logr’e apesar di cualkier contratiempo cu e por topa den su caminda,” Prome Minister a expresa.

 

Terminando, Prome Minister Wever-Croes a bisa: “A priminti Aruba cu lo crea mas oportunidad pa nos hobennan por haci deporte y Gabinete Wever-Croes ta cumpliendo cu esaki. Pabien Aruba”.