Ministerio di Desaroyo Sosial, Labor i Bienestar Minister Larmonie-Cecilia ta orguyoso ku 10 hóben a termina e projekto “Un Komienso Nobo”.
Willemstad – Komo un dje ‘partnernan’ den e projekto ‘Un Komienso Nobo’ ku ta keda ehekutá den kuadro di e akuerdo entre Kòrsou i Ulanda pa ku reformanan den ‘Landspakket’, minister Larmonie-Cecilia a bishita Marinekazerne Suffisant pa presensia entrega di sertifikado na e promé dies (10) hóbennan ku a termina e promé fase di 4 luna, ku eksito.
Na ougùstes 2021 Defensa Ulandes i Gobièrnu di Korsou a firma un kònvenant na Marine Basis Parera pa e trajekto di Sociale Vormingsplicht (SVT) ku i krea oportunidat pa hobennan entre 18 pa 24 aña por partisipá.
Na mart 2022 e promé grupo di hóben a kuminsa e trajekto i riba 9 di yüni 2022 na Marinekazerne Suffisant a hasi entrega di sertifikado na e 10 hóbennan orguyoso. Durante e trajekto di formashon, e hóbennan a partisipante a haña formashon sosial den konteksto militar. Di parti di Defensa Ulandes nan a siña norma i balornan, manera disiplina, outoestima, rèspèt propio i kon bira mentalmente fuerte i karga responsabilidat propio. E fase akí di e trajekto a dura 4 luna.
Un organisashon eksterno a keda enkargá ku e parti pa siña e hóbennan un fishi di un forma práktiko pa oumentá nan kapasidatnan i brinda e hóben un perspektiva pa futuro.
Tantu di parti di Defensa komo Gobièrnu a apuntá lidernan den e promé i e di dos fase di e trayekto, e asina yamá ‘leerwerktrajekten’(LWT).
Den presensia di nan famia, mandatarionan i Defensa Ulandes na Korsou e hóben Yaksel Nepomeceno a risibí un hèlm di plata pa tareanan ehersé durante un kontèst i Mesiah Nahr a keda skohé komo “ Best Man” di hinter e trajekto debí ke el a presta mihó.
Despues di e parti ofisial minster Larmonie-Cecilia a kombersá ku algun di e hobennan, miembronan di e ‘stuurgroep’ ku ta bou responsabilidat di señora Van der Gen i e ‘programmamanager’ señora De Sousa.
Minister Ruthmilda Larmonie-Cecilia ta desea e 10 hobenan éksito pa ku e trajekto ku ta sigui i ke motivá mas hóben pa inskribí pa e grupo nobo di 35 hoben ku tin di start pronto.
