2195 TRAHADÓ DI FISHI MUSTRA INTERES I A REGISTRÁ RIBA DIANAN DI REGISTRASHON I VIA IPE.CW

Durante e kampaña di registrashon organisá dor di RdK i CRU

2195 TRAHADÓ DI FISHI MUSTRA INTERES I A REGISTRÁ RIBA DIANAN DI REGISTRASHON I VIA IPE.CW

Willemstad, 12 di Yüni 2022 – No menos ku 2195 persona a registrá via IPE.CW i durante di e dianan di registrashon organisá pa Refineria di Kòrsou (RdK) i Curaçao Refinery Utilities (CRU.)  Mas ku mil hende a akudí na e dianan di registrashon pa haña sa di trahadónan di fishi interesá i disponibel pa traha den Kòrsou su industria petrolero.  For di djaluna último trahadónan di fishi por a bishitá e plataforma digital IPE.CW i registrá nan disponibilidat pa traha na refineria i e abilidatnan ku nan ta disponé di dje, i riba djabièrnè i djasabra por a akudí personalmente na e Dianan di Registrashon na Man Camp situá na Post 5. E portyal di IPE.CW ta keda habri pa tur ku ainda ta disponibel i ta interesá pa registra online. RdK i CRU ta sumamente satisfecho ku e resultado i ta gradisí un i tur ku a reakshoná na e yamada pa bin registrá i pa e esfuerso ku nan a tuma pa sea registrá online òf bini Man Camp na Post 5 pa demonstrá nan  gran interes pa traha den industria petrolero di Kòrsou.

E enfoke prinsipal di RdK i CRU ta pa kolektá e informashon di e personanan, e fishinan ku e personanan aki por ehersé i e areanan di interés ku e personanan lo ke desaroyá den djé. Durante e dos pa tres siman ku ta bini e departamentu di rekurso humano di CRU lo kuminsa pasa dor di e informashon ku a generá i kategorisá e diferente interesnan bou di a areanan kaminda ta buska trahadó di fishi. Despues di esaki lo tuma kontakto ku tur persona ku a registrá. E siguiente paso ta pa diferente di e trahadónan di fishi partispá na trainingnan spesífiko ku lo ofresé na e ‘CRU Vocational School.” Propósito di e skol di vokashon ta pa desaroyá e profeshonalnan di fishi ku lo laborá den entre otro industria petrolero pa medio di lès, training i guia, duna nan e hermènt i konosementu pa nan por desaroyá den trahadónan ku tin multiple abilidat .  Di e forma ki un persona por ehersé diferente fishi riba mas tereno i finalmente ekipá su mes ku un sertifikashon internashonalmente rekonosé. 

Proksimamente RdK i CRU lo drenta barionan ku  registrashon mobíl i informashon na hobennan ku ta bishitando skol. Durante e kampaña di registrashon mobíl lo pasa den barionan rònt Kòrsou pa fasilitá e proseso di registrashon di trahadó di fishi aun más. E kampaña di Informashon pa hoben lo enfoká riba promoshon bou di hubentut di e vokashonnan nesesario den sektor di utilidat, i pa informá nan tokante e oportunidatnan pa desaroyo personal i un karera den e mundu petrolero. 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: