Aqualectra ta sigui ku e siguiente fase pa hasi e tereno di Mundu Nobo liber AQUALECTRA TA KONTINUÁ KU TRABOUNAN DI DESMANTELASHON NA MUNDU NOBO

Willemstad 12 di Yüni – Durante di e próksimo 3 lunanan Aqualectra ta realisá e siguiente fase di desmantelashon di su instalashonnan na Mundo Nobo. Di e forma aki ta traha lugá pa mas desaroyo ekonómiko den e area di Mundu Nobo.  Na 2013 Aqualectra a kuminsá ku desmantelashon di su instalashonnan na Mundu Nobo. Na 2015 a realisá e di dos fase di desmantelashon i awor lo sigui ku e di tres fase.  Progresivamente lo sigui ku e di 4, 5 i di 6 i último fase di e desmantelashon di Aqualectra su plantanan na Mundu Nobo.  Aqualectra lo realisá e trabounan di desmantelashon na un forma sigur i ku menos molèster posibel pa tantu bisiña komo usuario di e kareteranan. Aqualectra ke pidi diskulpa pa kualke inkumbiniensha ku e trabou aki por kousa.

A opta pa realisá e trabounan di desmantelashon den fase pa asina garantisá efisiensia, seguridat i kousa menos molèster. Na luna di Mei 2013 pa Ougùstùs 2013 a realisá e promé fase di desmantelashon di Mundu Nobo ora a desmantalá e asina yamá ‘verdamper’ 5.  Entre Sèptèmber 2015 pa Yüli 2018 a realisá e di dos fase, ora ku a desmantelá ‘verdamper’ 3, 4 i 6, i alabes bòiler 8 te ku 11 i GT-1. 

Próksimamente  ta start ku e di tres fase di trabounan di desmantelashon ku lo terminá na luna di Òktober 2022. E trabounan den e fase 3 a keda repartí den kuater parti. Den e promé parti di e trabounan lo desmantelá entre otro un edifisio i 6 tanki ku anteriormente tabata almanesá fuel pa produkshon di awa i stom. Den e di dos parti di e trabounan lo desmantelá parti di algun tanki ku a keda usá den pasado pa prosesá i produkshon di awa. Den e último parti di e trabounan lo desmantelá e asina yamá ‘pijpenbrug’ ku ta e pipanan ku tabata keda usá pa transportá awa i ku ta kologá den laria. 

Durante e trabounan, habitantenan den serkania i outombilistanan ku ta trafiká den e area di Mundu Nobo, lo por eksperensiá sierto inkumbiniensha manera zonido i stòf. E trabounan di desmantelashon lo no tin un impakto riba produkshon diario di Aqualectra mirando ku e instalashonnan aki pa tempu kaba no ta den servisio. Aqualectra di e forma aki ta sigui dal paso den direkshon di krea e kompania di utilidat di futuro mientras ta krea mas posibilidat pa Kòrsou sigui desaroyá.

Grafiko di e areanan kaminda lo realisA e trabounan di desmantetalashon