Minister Rocco Tjon: COMISION DI EVALUACION A EVALUA E BUITENLANDSE ZORG Y A PRESENTA E HAYAZGONAN PA ARUBA

 

 

 

 

Minister Rocco Tjon:

COMISION DI EVALUACION A EVALUA E BUITENLANDSE ZORG Y A PRESENTA E HAYAZGONAN PA ARUBA

 

ORANJESTAD – Recientemente, minister di Husticia y Asuntonan Social Sr. Rocco Tjon a ricibi un presentacion amplio for di e comision di evaluacion cu a bay evalua e buitenlandse zorg cu ta tuma luga, specificamente pa hendenan cu tin problema cu adiccion of problemanan psikiatrico cu ta bay busca ayudo den exterior. Manera ta conoci Aruba ta manda clientenan den exterior pa busca e ayudo aki, pues e comison cu a evalua e instancia na Colombia den e caso aki, ta consisti di profesionalnan di Respaldo, FMAA, Reclassering, SPD y Directie Volksgezondheid, entre otro. Asina por bisa cu a forma un comision bastante amplio, pa evalua si e cuido cu ta wordo brinda den exterior ta di e calidad cu Aruba ta spera.  

 

Veilgiheidshuis a organisa e presentacion aki di e hayazgonan di e comision di evaluacion. E prome evaluacion, ta mustra di ta positivo, sinembargo, e vision di ministerio di Husticia y Asuntonan Social como tambe di e profesionalnan den e tereno aki, ta pa e prome fase, principalmente pa loke ta adiccion, tuma luga na Aruba mes, esaki ta mas miho pa e cuido tambe. A base di esaki, un di e consehonan cu a bin padilanti ta, pa evalua con por restructura e fondonan y e proceso aki a largo plaso, pa asina dentro di algun aña e cuido aki por tuma luga na Aruba mes. 

 

Actualmente, hopi placa ta wordo inverti pa por manda e clientenan afo, pues e idea ta pa logra yega na un structura, caminda a base di e proyeccionnan di e costonan envolvi, por establece e prome fase akinan na Aruba mes. A base di esaki, lo wak den cuanto aña ta logra break-even, pa asina no mester manda e clientenan mas den exterior. 

 

Pa loke ta e prome hayazgonan den e aspecto di infrastructura y aspectonan di e programa mes; e metodo cu ta wordo ofreci na e clientenan, ta igual na e metodonan cu ta wordo uza na Aruba tambe. Banda di esaki, e clinica caminda ta manda e clientenan actualmente, ta consisti di verpleegkundige, psikiatra, psicologo como tambe un kwaliteitsdeskundige, pues ta e tipo di profesionalnan aki, cual por cierto nos tin na Aruba aworaki, lo mester ta involucra den un trayecto asina. Pa e motibo aki, e ta importante pa evalua, con lo por establece e parti infrastructural na Aruba den fase como tambe amplia e cantidad di profesionalnan cu lo por bay brinda ful e trayecto aki na Aruba mes.