Daisy Coffie: Di 27 di yüni te ku 1 di yüli 2022 Konseho Insular di Boneiru tabata na Hulanda
Daisy Coffie
Di 27 di yüni te ku 1 di yüli 2022 Konseho Insular di Boneiru tabata na Hulanda pa diferente bishita di trabou, deliberashonnan i partisipashon; manera ta kustumber na e kongreso anual di Asosiashon di Muisipionan Hulandes (VNG) ku e aña aki a ser organisá na Hoorn, West friesland. Esaki ta un kongreso kaminda e munisipionan ta bini huntu pa kompartí i wak posibilidatnan di traha huntu i asina fortifiká otro; un plataforma pues ku tin komo parti di nan mishon fortifiká e gobièrnu nan lokal. Despues di 2 aña ku esaki a bai digital pa motibu di Covid e aña aki tabatin un kongreso ‘en vivo’ atrobe.
E delegashon di Boneiru a hasi bishitanan di trabou serka Sekretario di Estado di Relashonnan den Reino sra. Van Huffelen, Komishon Fiho di Relashonnan rden Reino di Senado (Eerste Kamer) i di Parlamento (Tweede kamer) i tambe Konseho di Estado (Raad van State). Tambe Konseho Insular a haña un splikashon tékniko di e kambio di WolBES i FinBES ku ta andando n’e momentonan aki.
Durante di e bishitantenan di trabou i deliberashonnan aki, e siguiente tópikonan a subi mesa:
– Kambio di WolBES i FinBES
– Retonan di kambio di klima
– Desaroyo di Plantashi Bolivia
– Supsidio pa WEB en konekshon ku subida di preis di koriente
– Posibilidatnan pa produkshon di energia duradero
– Posibilidatnan pa yuda mantené gastunan abou
– Kon por garantisá gobernashon segun prinsipionan di bon gobernashon
– Kon pa salvaguardá interesnan di Boneiru mihó na Hulanda.
– Ekspanshon di kantidat di miembronan di – Konseho Insular
– Infrastruktura
– Bonlab
Aunke Konseho Insular no a bai komo un solo forsa Hulanda, danki Dios e deliberashonnan a kana bon i ya a duna resultado kaba siman pasá: dos moshon a wòrdu presentá i aseptá den Tweede kamer; unu ta tokante bon gobernashon i e otro kon pa salvaguardá interesnan di Boneiru mihó na Hulanda. Aparte di e bishitantenan ofisial di Konseho Insular, Frakshon Coffie a hasi uso di e oportunidat i a reuní ku diferente mandatario i instansianan pa kompartí pensamentunan i nos vishon pa Boneiru i papia di e desaroyonan na Boneiru, e situashon sosial-ekonómiko di nos pueblo, desaroyo general di Boneiru, unda nos ta komo isla, unda nos ta bai i kiko tur mester pa logra alkansá e meta na bienestar general di pueblo di Boneiru. Iúltimo pero no ménos importante: Frakshon Coffie a deliberá tambe tokante di kiko Hulanda por nifika pa nos, kon Hulanda lo por yuda nos riba e ruta pa logra e meta final ku nos ta bai p’e komo Pueblo di Boneiru.
