Minister Arends:  Tin base suficiente pa aumento di tarifa di autobus

Minister Arends: 

Tin base suficiente pa aumento di tarifa di autobus

Riba e peticion ricibi di grupo di chaufeurnan di autobus, minister di transporte, Sr. Ursell Arends a pidi conseho oficial for di Departamento di Transporte Publico (DTP).

Den un carta dirigi na Chauffeur di Autobus Uni, minister Arends a elabora riba su consideracionnan pa e peticion. Entre otro e mandatario a nota cu e ultimo aumento di tarifa tabata na aña 2015 y cu salarionan minimo a ser adapta na 2019 como 2020. Tambe e mandatario a menciona cu mester considera cu e aumento di prijs di gasolin y diesel recientemente ta un situacion posiblemente temporal.

Minister Arends den su deliberacion a declara cu “basa riba e consideracionnan ariba mi ta considera cu tin base suficiente pa evalua un aumento di tarifa di autobus y pues ta compromete mi mes na inicia e proceso.”

Cambio di tarifa di autobus ta mara na un cambio di e ley, pa ta specifico Landsbesluit personenvervoer (AB 1997 GT 4). Un cambio di e landsbesluit aki mester bai conseho consultativo (Raad van Advies) prome y mester cana su proceso debidamente, cual por tuma algun luna. Pa es motibo minister Arends a pidi e grupo Chauffer di Autobus Uni pa declara periodo di “cool off” pa asina e por haya e espacio pa cana e proceso legal debidamente. 

Minister Arends a remarca si cu “atende cu problema y solucionnan strucutural tin preferencia riba solucionnan ad hoc di situacionnan temporal”. Aki ta referi na e prijs di gasolin actual, y tambe e hecho cu Universidad di Aruba ta trahando un estudio pa asina determina e “carrying capacity” di transporte publico, cual ta encera tambe autobus – cantidad di vergunning houders, ruta, y tambe prijs/tarifa. 

E mandatario ta declara di lo mantene e chauffeurnan di autobus envolvi den full e proceso, y ta conta cu nan comprension y cooperacion pa yega na un solucion, den cual ambos chauffeur di autobus y e usuarionan por biba cu’ne.

This site uses Akismet to reduce spam. Learn how your comment data is processed.

%d bloggers like this: