Minister Xiomara Maduro ta informa: Nomber y bandera di Aruba pa prome bes den e programa America’s Got Talent

 

RCC Aruba a clasifica pa e segunda ronda

 

Aruba a briya un bes mas riba tarima internacional cu un bunita presentacion di e grupo di acrobata RCC Aruba den e programa tan gusta America’s Got Talent (AGT). Pa prome bes Aruba su nomber a zona den e programa AGT. Pueblo henter por a wak cu hopi orguyo bandera di Pais Aruba ta briya riba un tarima mundial, di un programa cu mundialmente tin un sintonia hopi grandi.

 

Ken ta RCC Aruba

RCC Aruba ta consisti di bailarinnan Arubiano y acrobatistanan Colombiano, Cubano y Venezolano. Acrobatistanan di varios Pais internacional cu a haci Aruba nan cas. For di aña 2010 RCC Aruba ta duna presentacion den varios hotel aki na Aruba.

Minister Xiomara ta informa cu ya pa un tempo basta largo RCC Aruba a bin ta promove Aruba riba tarima internacional. Na aña 2019 RCC Aruba a cuminsa participa na festivalnan di circo internacional. Asina RCC Aruba a participa na ‘China International Circus Festival’ na aña 2019 y a duna presentacionnan na tres diferente ciudad. Na december 2020 e grupo di acrobatistanan aki a duna mas cu 60 presentacion na Budapest na Hungria.

Na januari 2021 RCC Aruba a participa na otro Festival di Circo mundialmente renombra ‘Circo ‘Budapest Circus Festival’ na Hungria. RCC Aruba a gana e tercer premio y un premio special.

 

RCC Aruba ta representa Aruba dignamente cu hopi orguyo y amor

Minister di Cultura ta subraya cu bunita di e artistanan aki ta cu na tur Pais caminda nan ta presenta, e grupo ta representa Pais Aruba y ta carga bandera di Aruba cu hopi orguyo y honor.

Desde di e presentacion di RCC Aruba na Budapest, e Grupo di artistanan a ricibi contratonan na circonan renombra mundialmente.

 

 

Actualmente RCC Aruba ta na Inglatera participando den e Summer Circus & Water Spectacular den Hippodrome Circus na Londres, Inglatera.  Esaki ta un circo unico ya cu su escenario ta rondona na awa. Despues di nan presentacion na Inglatera, nan ta continua na september cu presentacionnan na Italia y den luna di october na Francia.

 

Gradicimento

Minister di Cultura na nomber di Gobierno y pueblo di Aruba ta gradici tur miembro di e grupo di RCC Aruba pa stima y representa Aruba asina bunita. Danki pa promove  y laga bandera di Aruba briya riba tur tarima internacional durante boso presentacionnan. Pais Aruba ta hopi orguyoso di boso y masha pabien cu boso clasificacion pa e dos ronda pa e audicion den e programa di AGT. Boso por conta cu Aruba su apoyo!

 

This site uses Akismet to reduce spam. Learn how your comment data is processed.

%d bloggers like this: