Pregunta na Minister di BPD

Presidente di Parlamento di Kòrsou

Señora Ch. America-Francisca

Wilhelminaplein # 4

PRESENTE

 

Willemstad, 9 ougùstùs 2022

 

Tópiko: Habrimentu di vakatura i modernisashon dje aparato gubernamental

 

Señora America-Francisca,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di BPD enkargá ku entre otro asuntunan di personal, señor O. Martina.

 

Danki pa e koperashon.

 

Atentamente,

 

Ramón Yung

Parlamentario pa

frakshon di MFK

 

Minister di BPD

Señor mr. O. Martina
PRESENTE

Kòrsou, 9 di ougùstùs 2022


Tópiko: Habrimentu di vakatura i modernisashon dje aparato gubernamental

 

Apresiabel señor Minister,

 

Suskrito Ramón Yung miembro di Parlamento pa frakshon di MFK, for di na aña 2021 i tambe e aña aki a tuma nota di un kantidat di empleado públiko ku a hasi uso dje areglo di VVU. Un kantidat di alrededor di 780 empleado públiko por a bin na remarke pa hasi uso dje areglo di VVU, pero finalmente no ta tur a hasi uso dje oportunidat aki.

 

E areglo di VVU tabatin komo meta pa yuda den redukshon di gastu dje aparato gubernamental, pero na mes momento e proseso mester a sirbi pa yega na un aparato mas efisiente i moderno, hasiendo uso di teknologianan di digitalisashon i tambe outomatisashon.

 

Tambe e proseso lo mester a kontribuí pa redusí e “vergrijzing” den e aparato, kreando asina espasio pa atraé personal hóben ku un grado di preparashon haltu pa di tal forma garantisá un funshonamentu optimal dje aparato den futuro.

 

Redukshon dje aparato públiko, tabata un dje kondishonnan ku Ulanda a mara na e dunamentu di sosten finansiero. Den e kuadro aki a inkorporá esaki den e “Landspakket”, den kual ta papia di un plan pa “motivashon i halsamentu di produktividat dje amtenarnan”.

 

Tambe a kumbiní ku pa kada tres empleado públiko ku hasi uso dje areglo di VVU, lo por tuma un empleado a base di funshonnan krítiko. Suskrito sinembargo no a tuma nota dje proseso pa habri e vakaturanan, ni tampoko e plan di motivashon i alsamentu di produktividat di parti dje amtenarnan.

 

Konsekuentemente na diferente servisio di gobièrnu trabounan ta stanka, pa falta di kapasidat di personal pa por hasi e trabounan. Tin amtenar ku diariamente ta traha den un ambiente di frustrashon, pasó nan ta realisando trabou ku dos òf asta tres amtenar tabata hasi den pasado, ku konsekuensha ku ta surgi hopi retraso.

 

Tin departamentu kaminda ketu bai e gastunan di “over-time” ta eksorbitantemente haltu, debí ku no tin sufisiente trahadó. Siendo ku den e “Landspakket”, redukshon di gastu di “over-time” ta un dje puntonan di atenshon.

 

Frakshon di MFK tin informashon ku por habri vakatura pa un kantidat supstanshal di funshon i pa kual asta e medionan finansiero pa por kumpli ku esakinan ta disponibel.

 

Pa e motibunan ariba menshoná i hasiendo uso di artíkulo 96 di Reglamentu di órden di Parlamento di Kòrsou, nos kier a hasi Minister Ornelio Martina e siguiente preguntanan;

 

  1. Minister por informá kuantu amtenar a baha ku VVU te ku awor?

 

  1. Di e kantidat di amtenar ku a baha ku VVU, tin un indikashon kaba kuantu ta funshonnan krítiko?

 

  1. Tin un palabrashon ku di kada 3 amtenar ku baha ku VVU lo por remplasá nan ku un tersera parti. Pero si den un servisio di gobièrnu tin algun amtenar baha ku VVU i mas ku un tersera parti ta funshonnan krítiko, kon lo apliká e “entrada” (instroom) dje amtenarnan nobo den e respektivo servisio?

 

  1. Tin entidat kaminda ku for di promé ku e proseso di VVU, ya nan tabatin falta di personal. Kon ta bai atendé ku e entidatnan aki?

 

  1. Minister por informá ku e Ministerio di Planifikashon di Maneho i Servisio ta hasiendo un análisis dje situashon despues ku amtenarnan a baha ku VVU?

 

  1. Si esei ta e kaso, Minister por suministrá e respektivo informashon na Parlamento?

 

  1. Minister mes a tuma nota dje reklamo i kehonan ku tin den komunidat pa loke ta trata servisio na entidatnan di gobièrnu?

 

  1. Minister por konfirmá ku den e “uitvoeringsagenda” a inkorporá un plan di motivashon pa alsa produktividat bou di amtenarnan?

 

  1. Si esei ta e kaso, ki dia lo duna inisio na e programanan di motivashon i plan pa alsamentu di produktividat bou di amtenarnan?

 

  1. Di akuerdo ku e “Landspakket”, redukshon dje aparato pa medio di VVU lo mester a kana konhuntamente ku e proseso pa modernisashon, pa medio di digitalisashon, outomatisashon i hasiendo uso di teknologianan moderno. Minister por konfirmá esaki?

 

  1. Si e kontesta riba e pregunta aki ta afirmativo, Minister por splika si a duna inisio na e proseso di modernisashon aki?

 

  1. Si esei te na e momentonan aki no tabata e kaso, Minister por indiká ki dia tin intenshon pa inisiá ku e proseso di modernisashon?

 

  1. Minister tin indikashon kiko e invershon finansiero pa logra e proseso di modernisashon, digitalisashon i uso di teknologianan moderno aki lo bai kosta?

 

  1. Ministerio di BPD ta disponé dje medionan finansiero pa loke ta trata implementashon dje proseso aki pa loke ta resto dje aña aki?

 

  1. Mirando ku pago di “over-time” ta un peso supstansial riba presupuesto di pais. Minister por splika kual ta e pasonan ku lo bai tuma pa redusí e gastunan den pago di “over-time”?

 

  1. Un dje medidanan den e “Landspakket” tambe ta eliminashon di “vergoeding-nan” innesesario, o sea pago di “vergoedingnan” ku no ta legal. Minister tin un bista kaba ku enberdat tin amtenar ku ta risibiendo un “vergoeding” kual nan no tin derechi riba dje?

 

  1. Si esei ta e kaso, Minister tin un bista kuantu kaso a konstatá kaminda ku tabatin pago di “vergoeding” innesesario òf no legal na un of otro amtenar?

 

  1. Si a konstatá pago di “vergoeding” no legal, kual ta e pasonan ku a tuma pa evitá ripitishon den futuro?

 

  1. Tabatin kaso den kual e pago di “vergoeding” no legal tabatin reperkushon pa e amtenar enkuestion?

 

Sperando ku Minister lo kontesta nos karta ku preguntanan den e tempu definí den e protokòl firmá entre gobièrnu di Kòrsou i Parlamento, nos ta terminá ku un saludo kordial.

 

Atentamente,

 

Ramón Yung

Parlamentario pa

frakshon di MFK

Share this page to Telegram

This site uses Akismet to reduce spam. Learn how your comment data is processed.

%d bloggers like this: