UN BON KOMPORTASHON POR ALSA SEGURIDAT DEN NOS TRÁFIKO

MINISTERIO KONSERNÍ TRÁFIKO, TRANSPORTE I PLANIFIKASHON URBANO

 

UN BON KOMPORTASHON POR ALSA SEGURIDAT DEN NOS TRÁFIKO

PUBLIKÁ RIBA 15 OUGÙSTÙS 2022

Willemstad – Ministerio di Tráfiko, Transporte i Planifikashon Urbano, VVRP, ta dediká atenshon na siman di Seguridat den Tráfiko.

For di aña 2016, Gobièrnu di Kòrsou a deklará e di tres siman di ougùstùs komo ‘Siman di Tráfiko Sigur’. E aña aki, e siman ta di 15 te ku 19 di ougùstùs 2022.

Mirando e situashon i aksidentenan ku ta tuma lugá diaramente, a opta pa pone atenshon na e aspekto di ‘Konsientisashon’.

E aktividatnan ku lo tin den e siman aki ta entre otro:

·       Programanan di televishon i di radio dediká na siman di tráfiko sigur.

·       Diferente entrevista i mensahenan riba medionan sosial.

·       Tambe a hasi inougurashon ofisial di e ‘tèst straat’ nobo pa kúr vehíkulo na Keuringslokaal.  Na e okashon aki a enfatisá ku kada vehíkulo mester ta den bon kondishon pa e por subi kaya. Kada oumobilista obligatoriamente mester pasa via di e proseso pa kúr nan vehíkulo. Ta rekomendabel pa regularmente kontrolá bo vehíkulo, chek lusnan, tirenan, waiper etc. Un vehíkulo den bon kondishon ta kontribui na un tráfiko mas sigur.

Minister di VVRP, sr. Charles Cooper di su parti a i ta sigui traha pa haña e finansiamentu nesesario pa sigui optimalisá nos infrastruktura.

Minister Cooper ta hasi un apelashon na komunidat kompleto pa apliká un komportashon korekto i pone bon atenshón den tráfiko. No usa telefon miéntras bo ta stür, si bo ta stür no bebe, tene kuenta ku velosidat máksimo, i bisti bo faha di seguridat.

Huntu nos por yega na un tráfiko mas sigur.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: