Durante su discurso na “Homenahe na Etty” como muestra di agradicimento: Minister Xiomara Maduro a dedica poema na Etty

Diabierna anochi durante su discurso nos Minister di Cultura a expresa un gradicimento di curason na Etty pa su tremendo aporte na e cultura di Aruba.

 

Pais Aruba ta aprecia tur Etty su esfuersonan pa ta un tremendo embahador di Pais Aruba den exterior y pa pone Aruba su nomber briya riba tereno di musica internacionalmente. Masha Danki pa mantene nos cultura bibo, por medio di Etty su musica.

 

Na nomber di Gobierno y pueblo di Aruba, Minister Xiomara Maduro a dedica un poema na Etty, cual tabata lo siguiente:

  1. Nos por ta chikito den tamaño

Pero rico na talento y creatividad

Mane Etty sa bisa: Aruba mes tin tur cos

Berdad, nos tin tur cos.

 

  1. Baile di Seu
    ♫Ban baile, ban zoy’e♫
    Na bos halto: rond mundo a wordo canta

Nos dushi Papiamento a resona

 

  1. Etty, bo balor pa locual ta di nos,

A habri caminda y mustra Aruba henter cu:

Nos expresion artistico por wordo exporta

Nos don, talento y creatividad merece di wordo profila.

 

  1. Den su profesion como educador Etty a inspira.
    Danki pa guia, educa y forma:
    Generacionnan di hoben.
    Señor meneer di scol

  2. Dicon nunca mi a haya un rapport,

Cu ta duna punto pa amor?

Danki Etty pa uza klas como podium.

Danki pa comparti conocemento valioso di bida.  

  1. Awe, Etty, nos ta expresa nos gratitud
    Pa bo contribucion y bo curason,
    E dedicacion na bo musica y talento
    Pabien cu bo 65 aña den farandula.

 

Manera ta conoci Etty ta sufriendo un kebrante di salud y pa e motibo aki e no tabata por ta presente na Plaza Nicky Habibe Jr., pero si Etty y su sra. Corma a sigui e evento via medionan. Minister Maduro  a expresa na Etty: “For di aki na Plaza Nicky Habibe Jr., nos ta transmiti e amor y cariño di bo publico di tur diabierna atardi y pueblo di Aruba, na bo aya na bo cas na Companashi. Etty cu nos bon Dios sigui drama su bendicion riba bo y sigui cuida bo”. Un dedicatorio masha bunita cu Etty sigurmente merece cual a wordo masha aprecia pa e publico presente diabierna anochi.

Share this page to Telegram

This site uses Akismet to reduce spam. Learn how your comment data is processed.

%d bloggers like this: