DIÁLOGO DEN KUADRO DI DIA INTERNASHONAL DI KOMERSIO DI KATIBU I SU ABOLISHON

MINISTERIO KONSERNÍ ENSEÑANSA, SIENSIA, KULTURA & DEPORTE

 

DIÁLOGO DEN KUADRO DI DIA INTERNASHONAL DI KOMERSIO DI KATIBU I SU ABOLISHON

PUBLIKÁ RIBA 19 OUGÙSTÙS 2022

Willemstad – Ministerio di Enseñansa, Siensia, Kultura i Deporte, Komishon Nashonal di UNESCO Kòrsou, huntu ku Fundashon Museo Tula den kuadro di dia Internashonal pa rekordá Komersio Transatlántiko di Katibu i su Abolishon, ku sumo plaser ke invitá pueblo di Kòrsou, dia 23 ougùstùs 2022 na nos diálogo riba e tema: Kiko ta Reparashon? Tin Reparashon hustu si òf no?

E tema ta riba agènda den Karibe pa basta aña kaba i den sierto sírkulonan na Kòrsou tambe e tema akí a kuminsá lanta kabes. Nos mester sigui  den deliberashon tokante reparashon, su nifikashon en general pa Kòrsou i organisá aktividatnan ku ta resultá den oumento di  partisipashon di pueblo na e diálogonan akí. E programa di e aña akí ta enserá un introdukshon di kiko Reparashon ta nifiká, siguí pa un diálogo entre dos eksperto, riba e tópiko; Kiko Reparashon pa Kòrsou ta nifiká riba tereno hurídiko i tambe riba tereno polítiko estatal. Ekspertonan ta mr. Susanne Camelia-Römer i sr. Clyde van Putten. Kor Orfeon Allegro ku su elenko di koristanan lokal lo kanta kantikanan di trabou .

E aktividat ta tuma lugá djárason 23 di ougùstùs 2022 na University of Curaçao Dr. Moises Da Costa Gomez, Jan Noordynweg # 111 di 19.00 pa 22.00.

Nashonnan Uní ta rekordá internashonalmente e komersio Transatlántiko di afrikano sklabisá i su abolishon tur 23 di ougùsts. E petishon ta pa paisnan no solamente para ketu na e hecho ku e komersio akí a dura mas ku 4 siglo, pero tambe ku e komersio akí ta keda marká komo e periodo mas kruel ku humanidat a konosé. Nashonnan Uní ta supliká pa pueblonan dialogá riba e influensia ku e susesonan akí tin riba nos pensamentunan i kon nos mester trese kambio positivo den nos komunidat. Esei ke men puntra nos mes kon nos ta kibra ku rasismo, kolorismo, inhustisia òf kon nos ta sigurá nos libertat, sin ku esei ta bai akosto di otronan. Parti di e deliberashon ta tambe, kon nos por logra mas solidaridat bou di otro pa krea bienestar hustu pa un i tur. Naturalmente kada pais ta dialogá riba e tema akí den kuadro di kiko e komersio Transatlántiko a nifiká pa nan historia i kultura, pues den nan konteksto.

Bo(so) presensia ta altamente apresiá.

Share this page to Telegram

This site uses Akismet to reduce spam. Learn how your comment data is processed.

%d bloggers like this: