Siman di trafiko sigur.

 

 

Willemstad – 20 di ougùstùs 2022

 

For di 2016 Ministerio di VVRP ta pone 1 siman dediká na seguridat den tráfiko. I e siman di 15 pa 19 di ougùstùs 2022 tabata e siman di tráfiko sigur. Esaki a keda inougura djaluna dia 15 di ougùstùs na lokalidat di Kùr. Den presensia di ‘stakeholder’ nan manera vvrp, ow i bosero polisial. Gobièrnu a para ketu e aña aki na e 3 ‘E’ nan den seguridat di tráfiko ku ta ‘Education, Engineer i Enforce.’

 

Nos di Partido Inovashon Nashonal ta sumamente desapuntá pa e atenshon pober ku a duna na e tópiko. 

i tambe nos ta mira algun tópiko ku mester atendé i ku esakinan no tin atenshon di Gobièrnu.

Banda di esaki tambe lamentabelmente nos ta bolbe lanta i mira kon tráfiko insigur ta kobra mas viktima.

Den e kaso aki 2 trahadó ku a sali pa bai laborá djasabra mainta i lamentabelmente esakinan no por a termina nan trabou i bai nan kas bèk pa motibu di inseguridat den tráfiko. 

 

Den e kuadro aki nos a sinti falta di atenshon pa e siguiente puntonan:

 

1. Den e stakeholdernan (interesado) ku a akudí na inougurashon di siman di tráfiko sigur no tabatin ningun persona di ofisina di rijbewijs presente. Kual ta un di e Stakeholdernan mas importante den henter e tema.

 

2. Siman di tráfiko sigur mester a bira un siman kaminda mester a pone hopi mas informashon riba e tema i konsientisá usuarionan di tráfiko. Esaki no a pasa. Solamente kuerpo polisial tabata saka algun anunsio pa konsientisa nos hendenan.

 

3. Gobiernu tampoko no a hasi nada ahinda pa e parti di edukashon. Por ehempel: 

• Kon tin ku atende ora ta sera kaya pa traha.
• Reëduka shofurnan ku a komete kualke infrakshon grave den tráfiko pa nan por bolbe partisipá na un manera resposabel bek den tráfiko.
• Eksamen pa saka ‘rijbewijs’ ku ta basá riba e lèi di 1957 ku no ta kuadra ku e situashon aktual. 

 

4. E parti di infrakstruktura ku nos a bin ta papia hopi di dje. Kayanan ku ta pasa den barionan ku a bira drùk. I ku Gobièrnu no a adaptá e situashon pa mehorá e seguridat.

 

Tambe nos di Partido Inovashon Nashonal ke para ketu riba e seguridat ku ta eksihí di un vehikulo pa e por partisipá den nos tráfiko. Hopi vehikulo ku ta bini nobo no tin ni sikiera un airbag den dje. 

 

Partido Inovashon Nashonal ke pa Gobièrnu pone atenshon riba e puntonan aki pa asina alsa e seguridat pa nos tur ku ta partisipá den tráfiko. I tambe nos ke ekstende nos mas sinsero pesame na famia i konosínan di e trahadonan ku a perde nan bida den trafiko.