CURINDE ta informá Minister Cijntje i Minister Larmonie-Cecilia tokante DESAROYONAN INOVATIVO IMPORTANTE PA MAKSIMALISÁ POTENSHAL PARKE I ZONANAN OPERÁ PA CURINDE

Willemstad 28 di Ougùstùs 2022- Resientemente Curaçao Industrial and International Trade Development Company N.V. (CURINDE) a tene presentashonnan separá na Minister enkargá ku Desaroyo Ekonómiko Sr. Ruisandro Cijntje i Minister enkargá ku Desaroyo Sosial, Labor i Bienestar Sra. Ruthmilda Larmonie-Cecilia. Durante ambos reunion a pone e Ministernan na altura di e direkshon stratégiko ku CURINDE ta kana, pa asina nos Zona Ekonómiko por bira kompetitivo i atraé empresanan ku balor agregá pa nos ekonomia i mas empleo. Un punto importante den esaki ta e kambio den e lei ku ta rigi nos Zonanan Ekonómiko ku mester keda adaptá na nórmanan internashonal. Meskos ta importante finalisá e trámitenan pa habri un área industial na Nieuwe Haven, pa kua ya kaba tin hopi interes i petishon pa hür di alrededor di 24 mil meter kuadrá kaba loke ta representá 25 kompania. Ambos Minister a hasi bon uso di e enkuentro pa asina por pone nan mes na altura di e desaroyonan, pero tambe profundisá den temanan relatá na CURINDE ku pa nan ta di interes.

 

Zonanan Ekonómiko rònt mundu, i den nos region sigur, a bin ta kontribuí engrande na kuponan di trabou.  E direkshon stratégiko ku CURINDE huntu ku Gobièrnu a skohé ta pa modèrnisá nos Zonanan Ekonómiko i ta dirigí nétamente riba industrianan kaminda por krea mas desaroyo ekonómiko i empleo, prinsipalmente bou di nos hobennan. Industrianan manera BPO (servisionan di sosten empresarial realisá den otro pais ku esun kaminda e servisio ta keda ofresé) i call-centers ta brinda e oportunidat aki. Pero pa Kòrsou por atraé empresanan pa bin establesé den nos Zonanan Ekonómiko, nos mester modèrnisá nos leinan pa nos por ta kompetitivo i alaves alkansá sistemanan digitalisá modèrno ku ta agilisá procesonan den e kadena logistiko.

 

E forma ku nos ekonomia a hisa kabes tin komo resultado ku tur espasio disponibel den parke Industrial Brievengat ta yená. E interes pa mas espasio den zonanan industrial adekuá ta opvio tambe, si nota e gran interes ku tin pa establesé den e área industrial na Nieuwe Haven, kaminda tin un gran kantidat di kliente wardando pa e área bira operashonal. CURINDE ta kolaborando ku tur envolví pa mas pronto posibel esaki por ta operashonal.

 

Tantu Minister Cijntje komo Minister Larmonie-Cecilia a keda poné na altura di e desaroyonan aki na CURINDE. Aparte di esaki a atendé tambe ku Minister Cijntje un invitashon ku a drenta di e organisashon ku ta representá interes di markanan internashonal ‘International Anti-Counterfeiting Coalition’ (IACC) pa ta  oradó di orden durante di Europol Intellectual Property Crime Conference ku ta tuma lugá dia 27 pa 28 di Òktober próksimo na Roma, Italia. E konferensha ta keda organisá pa EUROPOL i IACC. Esaki ta un gran oportunidat pa presentá Kòrsou na representantenan importante di markanan ku tin presensha rònt mundu i na mes momentu pa papia ku representante di algun marka ku por skohe pa establesé na Kòrsou.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: