Konsierto “Tur kos pa mi Rei”
Willemstad, 28- 8- 2022
Ayera den un sala kompletamente yen den edifisio di Arise na Muizenberg St.Jacobs, sentenares di persona a bini huntu pa e Konsierto titulá: “Tur kos pa mi Rei”.
E konsierto grátis aki tabata úniko.
Despues di un temporada di pandemia den kual pa motibu di reglanan pa protekshon kontra kontagio di Covid no tabata posibel pa tin konsiertonan di e índole aki, un multitut a uni huntu pa eksperensiá kon hóben, hóben adulto i adultonan dotá ku talentonan a trese speransa i goso na e pueblo.
E konosido kantante Shelomi Doran-Bakhuis konosí komo “Shelly” a trese personanan di tur gremio i iglesianan huntu pa deklará ku den un temporada kontorversial pa ku reinadonan, nan ta skohe di alsa e Rei di tur reinan riba tur reinado i tur nashon pues tambe riba Kòrsou.
Den e ekspreshon di unidat den diversidat aki, Shelomi a uni ku algun otro kantante i gruponan musikal manera: Proskuneo, Zamar, T.R.U.E., Nyah Angely, Jeffery Tromp, Reuben van Lierop, Rolison ‘RSP’ Peny, pa trese un konsierto na un oudiensia ku tabata sperando esaki ku gran espektativa.
Pabien na tur ku a uni huntu pa mira e vishon noble di union aki pa entregá tur kos pa e Rei kumpli. Mishon kumplí.
“Ad hunto” Algun potrèt di e konsierto aki.
Na nòmber di komishon organisador
Rudienne Doran
