Premier Wever – Croes: ARUBA TA TUMANDO E INICIATIVA Y TA PURBANDO MANERANAN NOBO PA HACI COSNAN DIFERENTE
Aruba Innovation Summit 2022
ORANJESTAD – E siman aki a tuma luga e conferencia anual Aruba Innovation Summit 2022: The New Era of Reinvention. Prome Minister di Aruba alabes Minister di Innovacion Evelyn Wever – Croes a expresa na e ocasion cu e ta un honor pa hiba palabra y duna bon bini na tur cu tabata presente na e evento. Proposito di e conferencia ta pa trece e comunidad hunto pa colabora y inspira otro.
Prome Minister Wever – Croes a traves di un video a adresa e publico cu a atende e Arubba Innovation Summit, pa conta un poco di su trayecto profesional y con na dado momento mester a reinventa su mes y e importancia di ta habri pa cambio. Premier Wever – Croes kende ta esposa, mama, wela y un persona di famia, 13 aña pasa nunca lo por a imagina su mes den e posicion cu e ta awe. Prome Minister kende tabatin e funcion di “Tax and Civil Laywer” den sector priva y henter su carera di abogacia su dilanti. Sinembargo, e tabatin e sentimento cu kisas e tin un otro proposito den bida, el a splica. Sin sa exactamente kico e proposito aki tabata, nunca a imagina su mes como un politico y mucho menos Prome Minister.
‘E ta tuma hopi curashi pa sali for di bo esapcio confortabel y pa ta den un posicion vulnerabel, pa lucha pa locual cu bo ta kere aden. Mientras cu bo ta habri pa siña mas cu ta posibel na caminda. E ta tuma curashi pa dicidi pa reinventa,’ Prome Minister a expresa. Sea cu ya bo sa kico ta bo meta, of si bo ta den e proceso di busca esaki, e trayecto lo siñabo e les di mas valioso y pa disfruta di esaki. ‘Laga nos tuma e paso hunto pa ta habri pa ideanan nobo, aceramentonan nobo y acelera innovacion pa nos isla Aruba. Nos por siña di otro, y nos por inspira otro pa haci mesun cos.’
Manera Albert Einstein a bisa: Bo no por resolve un problema cu e mesun mentalidad cu a crea esakinan. Nos tempo ta awo. Aruba ta tumando e iniciativa y ta purbando manera nobo pa haci cosnan diferente.
Terminando Prome Minister a expresa cu no tin ningun duda cu nos isla a pesar di tur su retonan y restriccionnan, tin loke ta necesario pa logra metanan grandi. Y cu a traves di e Aruba Innovation Summit, tur hende por embarca e trayecto di re inventacion y descubrimento aki.
