TUR VEHÍKULO MESTER PASA PROSESO DI KÙR

MINISTERIO KONSERNÍ

 

TUR VEHÍKULO MESTER PASA PROSESO DI KÙR

PUBLIKÁ RIBA 08 SÈPTÈMBER 2022

Willemstad – Servisio di Tráfiko i Transporte (UOVV) ta enfatisá ku tur vehíkulo mester pasa e proseso di kùr. Vehikulonan den transporte públiko, pick-up i trùknan grandi ta kùr kada aña i sobránan kada dos aña. Sea e vehíkulo ta di dos òf kuater wil, ta importante pa nan ta di kùr. Esaki ta pa garantisá seguridat den tráfiko. E vehíkulo mester ta den kondishon optimal pa e subi nos kareteranan. Rekomendabel ta pa laga un mekániko revisá e vehíkulo promé ku e dia di kùr.

Pa kùr vehíkulo mester traha un sita via di lokèt digital, https://sitaautokeuring.gobiernu.cw òf yama ‘Bentana di Informashon’ na 434-1690. Riba dia di sita e persona ta presentá na UO-VV, (Keuringslokaal) situá na Parera patras di Selikor.

Mester kontrolá bo ‘Keuringskaart’ i traha bo sita na tempu. Pa kùr un vehíkulo mester paga Fl. 30,- i si e ‘keuringskaart’ kaduká esaki ta rekerí un suma di Fl.60,-. ‘Herkeuring’ denter di 30 dia ta kosta Fl.10,- i despues di 30 dia Fl.30,-. Na momento di paga e kliente mester ‘swipe’ òf hasi transakshon ‘online’. No ta aseptá sèn kèsh.

UOVV ta rekordá komunidat ku na momento ku mester bai kùr, no ta permití un kantidat di persona den e vehíkulo. E shofùr so ta atmisibel na e momentonan ei. Otro detaye ta, ku ta permití solamente e persona ku ta disponé di e papel hel i e vehíkulo ku mester kùr subi tereno di ‘Keuringslokaal’. E kliente ta risibí epapel hel serka e kahera. E medida aki ta pa garantisá seguridat di tantu e funshonario di ‘Keuringslokaal’ i públiko en general.

UOVV ta gradisí pa e komprenshon i ta keda kòrda pa traha bo sita pa kùr na tempu.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: