PROGRAMA PA SEKTOR DI AGRIKULTURA DEN KUADRO DI SEGURIDAT DI ALIMENTO

Ministerio di Salubridat, Medio Ambiente i Naturalesa

 

PROGRAMA PA SEKTOR DI AGRIKULTURA DEN KUADRO DI SEGURIDAT DI ALIMENTO

 

Willemstad – Resientemente un delegashon di Banko Mundial tabata di bishita serka Minister sra. Dorothy Pietersz-Janga pa trata e tema di seguridat i produkshon di alimento. Seguridat di alimento ta mas kompleho ku solamente e produkshon. E ta enserá disponibilidat, akseso i kontenido nutrishonal di alimento ku ta konsistente i saludabel.

 

Durante di e bishitá ku Minister sra. Pietersz-Janga a diskutí riba e programa di seguridat di alimento ku Banko Mundial ta preparando pa Kòrsou. E programa aki ta forma parti di Sustainable Energy and Marine Biodiversity Program RESEMBID, implementá pa Expertise France, Banko Mundial i Global Facility for Disaster Reduction and Recovery (GFDRR) i ta keda finansia dor di Union Europeo. Esaki ta kuadra ku e vishon i plan pa fortifiká seguridat di alimento komo elemento primordial pa yega na un struktura fuerte den e sektor di agrikultura na Kòrsou. 

 

E delegashon a konsistí di dos ekonomista di agrikutura, un agronomo i un ekonomista di desaroyo. Den kontinuidat di e programa di evaluashon ta bai trata puntonan mas ekstenso ku e diferente aktornan riba nos isla.

 

Na luna di Mart e aña aki Minister President sr. Gilmar Pisas a hasi un petishon na Banko Mundial pa yuda den un evaluashon rápido di seguridat di alimento despues di e pandemia di COVID-19. Meta di e evaluashon ta pa bin ku rekomendashonnan kon pa garantisá suplemento di alimento di un forma sigur despues di un pandemia. Un reportahe di tur e rekomendashonnan ta plania pa fin di novèmber 2022.

 

Durante di e bishita di e delagashon na Kòrsou e programa a enserá vários reunion. Un promé reunion tabata ku diferente stakeholder den sala di Banko Sentral unda a tene un seshon informativo i interaktivo ku presentenan. 

 

Den kurso di e siman a tene mas ku trienta (30) reunion relashoná ku seguridat di alimento ku entre otro produktornan lokal, importadornan, organisashonnan di gobièrnu i otronan ku ta brinda yudansa.  

 

Agrikultura ta un sektor prometedor pa loke ta diversifikashon den nos ekonimia lokal. E promé impreshon di e delegashon ta ku tin hopi oportunidat pa mehorá seguridat di alimento riba nos isla dor di siguí promové produkshon lokal, na kas i den nos skolnan enfokando riba kuminda sigur i balansá. 

 

Riba e potret #1 por mira Minister Dorothy Pietersz-Janga, sr. G. Murray  Direktor di Sektor di LMN, huntu ku e delegashon bou di guia di e agrónomo sr. Pieter van Baren.

Share this page to Telegram

This site uses Akismet to reduce spam. Learn how your comment data is processed.

%d bloggers like this: