CU E MESUN DEDICACION Y EMPEÑO LO SIGUI TRAHA PA PROGRESO Y BIENESTAR DI COMUNIDAD

 

Premier Evelyn Wever – Croes:

 

Gabinete Wever – Croes 2 ta cumpli 1 aña den gobernacion

 

CU E MESUN DEDICACION Y EMPEÑO LO SIGUI TRAHA PA PROGRESO Y BIENESTAR DI COMUNIDAD

ORANJESTAD – 20 di september 2022 ta cumpli 1 aña desde Gabinete Wever – Croes II a huramenta. Partido MEP y Raiz a wordo scogi pa goberna durante tempo dificil, sinembargo ora mira bek atras ta mira cu hopi gratitud y orguyo tur locual a logra hunto.

 

Prome Minister Evelyn Wever – Croes, liderando Ministerio di Asuntonan General, Innovacion, Organisacion Gubernamental, Infrastructura y Planificacion Teritorial, a enfrenta hopi reto.

Den cuadro di stabilisacion di e situacion financiero di Pais Aruba, Prome Minister mester a traha riba un Gobierno mas eficiente reduciendo su gastonan. A haci hopi esfuerso den cuadro di e Landspakket, pa crea mas eficiencia den gobenacion, a baha gastonan di personal desde 2018 y cada aña a sigui baha esaki. A traves di e proyecto di VUT, mas di 115 persona a haci uzo di esaki contribuyendo asina na baha gasto tambe.

 

Ademas a traha riba fortifica Aruba su pilar democratico. Contraloria General / Algemene Rekenkammer (ARA) a haya hopi atencion y a percura pa e hunta di ARA su miembronan ta completo. Banda di esaki a asisti nan na organisa e Conferencia Internacional CAROSAI. ARA tin un trabou importante cual ta pa asisti Gobierno y principalmente Parlamento di Aruba den percura pa mas transparencia y eficiencia den Gobierno y pa asina Parlamento por controla Gobierno miho.

 

Pa loke ta trata e evaluacion di CFATF, Aruba a score excelente pa loke ta integridad financiero di nos pais. Prome Minister a traves di su Ministerio a lidera e comision cu a traha riba esaki na Aruba, cual a yuda hopi cu e evaluacion. Tur e esfuersonan aki a haci cu Aruba ta posiciona como number dos den Caribe pa integridad financiero.

 

Durante e prome aña di gobernacion, Gobierno a dedica hopi atencion na Covid. Recientemente a de-escala y a bay den fase di rehabilitacion. Sinembargo ta wak bek na un periodo cu a siña nos hopi, principalmente cu semper mester ta bon prepara. P’esey a inverti den Bureau Rampenbestrijding Aruba (BRA) cu awor tin centronan di entrenamento pa por yuda tur hende pa ta miho prepara den caso di cualkier calamidad.

 

Diferente avanse a tuma luga tambe riba tereno di innovacion y digitalisacion. A traves di inversionnan den e Departamento Directie Informatievoorziening en Automatisering (DIA), ta asistiendo departamentonan di Gobierno pa digitalisa y hiba procesonan na otro nivel di eficiencia. Pa loke ta innovacion, a realisa hopi proyecto a traves di Futura. Entre otro, tabatin “Innovation Summit” cu a wordo hopi bon bishita pa personanan cu tin e entusiasmo pa reinventa nan mes. Futura a traha riba diferente otro proyecto pa trece innovacion mas cerca di muchanan y adultonan, pa asina yuda pa cada uno ta prepara pa desaroyonan di futuro.

 

Banda di esaki recientemente a anunica e Edutech Fund, e fondo di 400 mil florin cu tin disponibel e aña aki pa scolnan. Maestro, cabesante, alumno y/of mayornan por bin cu proyectonan di innovacion, inscribi y gana.

 

Den e aña aki di inversion y oportunidad, departamentonan di infrastructura a traha duro hunto pa asina yuda stimula e inversionnan cu tin mester pa recuperacion di Pais Aruba.

Prome cu inicio di aña escolar nobo, DOW a traha duro y prepara diferente scol. Banda di esaki, nan a traha tambe riba varios proyecto di turismo, entre otro na Rodgers Beach, proyecto di santo blanco na Boca Catalina, Arashi y Eagle Beach. Nan a construi e rotonde na Palm Beach y e rotonde na Adrian Lacle Boulevard – Wilhelminastraat. Pues hopi trabou a wordo haci apesar cu tabatin poco fondo.

 

Departamento di DTI a concentra riba siguridad como tambe riba e tema di ATV/UTV pa trece nan den cuadro di siguridad, respetando naturalesa. Mester menciona cu DTI tabata envolvi tambe cu luznan di caya.

 

Pa loke ta Kadaster, a concentra riba digitalisacion y pa prome biaha den hopi tempo, por paga cu ATM.

Departamento di Infrastructura y Planificacion (DIP) tin su retonan, manera ta conoci tin investigacionnan penal andando na e departamento pa motibo di mal maneho hiba den pasado pa e ministernan di infrastructura anterior, cual tin e departamento manca. Sinembargo, ta trahando duro pa por surpasa esakinan unabes cu e casonan penal finalisa, pa DIP por mehora su servicionan na comunidad. Aworaki e enfasis ta riba e ROPV cual ta e plan di desaroyo teritorial, pa trece regla y orden.

 

Di e manera aki, e departamentonan cu ta resorta bou di Ministerio di Asuntonan General a traha pa mehora servicio na nos comunidad. Den esaki, CENSO ta un ehempel cu ta brindando un tremendo servicio. Lo enfoca pa mehora servicio na tur Hulpbestuurskantoor / MFA tambe y haci esaki mas eficiente y lihe pa cada ciudadano. Riba e reto di legislacion, ta trahando pa elimina e atraso cu tin y adapta nos leynan na e necesidadnan di awo.

 

“Tur esaki a wordo realisa den apenas 1 aña, y nos por garantisa cu e añanan nos dilanti, Gabinete Wever – Croes II lo sigui traha cu e mesun empeño y cu e mesun dedicacion y energia, pa crea progreso y bienestar pa henter comunidad”, Prome Minister Evelyn Wever-Croes a enfatisa.