Kolegio Ehekutivo ta manda rapòrtnan públiko pa Konseho Insular

Djabièrne 23 di sèptèmber Kolegio Ehekutivo a ofresé tres dokumento, ku den promé instante tabata konfidenshal, un biaha mas na Konseho Insular. Ta trata di e ‘Quick Scan’ relashoná ku Bonaire Laboratorium NV, e Akuerdo di Desaroyo Sunset Beach Resort i e rapòrt di e investigashon tokante e rotònde na Kaya Amsterdam.

E motibu ku a tene e rapòrtnan konfidenshal, ta pa motibu ku nan tabata kontené nòmber di personanan privá i informashon di empresa, ku pa lei mester protehá. Entretantu a anonimisá e informashon privá. Asina Kolegio Ehekutivo por kompartí e dokumentonan di un forma ku por atendé e kontenido den Konseho Insular.

Kolegio Ehekutivo ta para pa gobernashon transparente i semper ta dispuesto pa kompartí informashon i desishonnan ku a tuma ku públiko. Di otro banda, Gobièrnu tin ku tene su mes sí na reglanan vigente i tin e obligashon pa sòru ku no ta violá derecho i privasidat di otronan.