Nos tur ban kunuku, planta i krese nos pais.

Nos tur ban kunuku, planta i krese nos pais.

Willemstad — Siman di kultura dje aña aki tin komo tema: ‘Ban Kunuku, Ban Planta’. Bida ta kuminsá
ku plantamentu di mata. Plantamentu ta krusial den desaroyo di kultura di hende rònt mundu. E
mata ta kuminda — fruta, bèrdura — nesesario pa sobrebibensia i salú di hende i bestia, i ta forma
parti di kultura di un país. Tantu den su forma krioyoyo di prepará kuminda i komo parti di
selebrashonnan spesifiko manera Pasku, risibimentu i selebrashon di aniversario. Laga nos tur ban
planta.
Djis kòrda riba e fiesta di Sehú, kaminda kosecha, baile, músika i presentashon di fruta i bèrdura
kosechá na kunuku ta bin huntu den un selebrashon kultural ku musika i kanto tipiko di nos país. Tur
aña nos ta marcha i selebrá den kayanan di Otrobanda lokual nos a kosecha den kunukunan di
Bandabou i Bandariba.
Den e kuadro di e selebrashon kultural ‘Ban Kunuku, Ban Planta’, e skol básiko ‘Fatima College’
a pidi Partido Inovashon Nashonal (PIN) pa duna un workshop di plantamentu pa hinter e skol.
Awe 28 di mart 2022 PIN a siña e muchanan di e diferente añanan eskolar for di nos chikititunan
(“kleuter”) te ku grupo 8, un total di mas o menos 350 mucha, kon ta poné tera i planta ku simia den
un kùp.
PIN a spliká e muchanan kon ta kuida pa e simia lanta kabes i bira un mata ku después por planta
den un baki mas grandi of den tera, hasta den un krans di otro mata pa spar awa.
Nos a skohé bonchi largu, “kouseband”, pasobra e ta nasé den menos k’un siman i ya den mas o
menos 3 luna di tempu por kosechá. Kouseband ta un bonchi fasil pa prepará na diferente manera,
hopi dushi i salú!
Nos ke terminá ku un danki di kurashon na direktor, staf i maestronan di Fatima College ku a mira e
importansia di laga mucha siña planta for di chikí.
Laga nos tur ban planta!

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: