Un produkshon ku 15 kansion ikóniko: ICONS ta lansa studio albùm “Iconicprint”

Un produkshon ku 15 kansion ikóniko:

ICONS ta lansa studio albùm “Iconicprint”

 

WILLEMSTAD/  Ayera, Fusions den Saliña tabata esenario pa lansamentu di e promé studio albùm di ICONS. Esaki ta un logro hopi grandi pa e tim ku a bin ta traha inkansablemente pa krea un stèmpel ikóniko pa nan estilo, zonido i presentashon. ICONS ta lansa un studio albùm ku 15 piesa, yen di sabor, amor i bon vibrashon. Entre nan e hitnan ku ya kaba a bin ta zona na radio manera Amor Real, For Real, I’m Moving On i Una Escapadita. Pero tambe esnan nobo manera, Otro Bida ku a keda lansa ayera ku su video clip!

 

E “Iconicprint Event” a resultá un evento masha ameno. Ku presensia di prensa i tur kantante i músiko di e banda i algun invitado spesial e grupo selektá a koroná un trayekto di kasi 1 aña. Kantantenan Dju Dju V, AmoreusZ, HnlY i Papito ConQ tabata sumamente kontentu. Ounke nos ta bibando den un tempu na unda tur hende ta ‘stream’ piesa, riba plataformanan digital tòg ICONS ku e produkshon aki ta imprimí su seyo ikóniko pa semper den e mundu di farándula lokal. Di akuerdo ku Efrem Mambi, esei ta e intenshon tambe. Ta p’esei un CD i un tarheta USB, bunita presentá. T’e máksimo deseo pa e fanátiko balorá e produkshon, ya ku a hasi hopi esfuerso pa realis’é.

 

ICONS ta un banda ku a sigui produsí sin kue rosea, por menshoná piesanan ‘live’ den tur género i naturalmente e produkshonnan grabá- sinembargo e produkshon aki  “Iconicprint” ta e korona di tur! Ta p’esei ta importante pa e fanátiko tin’é den su kolekshon. Di akuerdo ku maneho di e banda, esaki ta e promé i kisas e ultimo produkshon den su forma i estilo- ya ku no ta usual mas pa banda òf kantante traha henter un albùm ku 15 piesa. Pues indiskutiblemente e ta ikóniko! ICONS ta gradisí tur radioemisora i fanátiko; kansionnan di ICONS ta gran faborito den lista musikal di kualke DJ i lokutor na Kòrsou, Aruba i Boneiru i p’esei Masha Danki!.

 

LINKS:

ICONShttps://www.instagram.com/iconscuracao/

 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: