Presidente di Madeira, Dr. Miguel Albuquerque, di bishita na Kòrsou

Presidente di Madeira, Dr. Miguel Albuquerque, di bishita na Kòrsou

Selebrashon dia 11 di Òktober 2022

Willemstad- Kòrsou pronto lo risibí bishita spesial for di Madeira. Dr. Miguel Albuquerque, Presidente di Gobièrnu Regional di Madeira, lo ta na Kòrsou di 10 pa 12 di òktober 2022 pa promé biaha. 

E presidente ta bin sera konosí ku e komunidat Madeirense na nos isla, komo tambe e pueblo lokal di nos dushi Kòrsou pa selebrá huntu ku nos e asina yamá Fiesta di Arraial dia 11 di Òktober 2022 na Parokia di Suffisant. 

Dòkter Miguel Albuquerque lo no ta e úniko Madeirense konosí ku lo bishitá nos isla. Spesial pa e evento aki e konosido artista Madeirense Miguel Pires, entre otro konosí pa su interpretashonnan Portugues i Internashonal manera por ehèmpel di Elton John, , tambe lo tei ku su “Miguel Pires Trio” pa un tremendo show.

E Fiesta di Arraial ta un tradishon religioso Madeirense karakterisá pa dekorashonnan di lus i flor, gruponan di músika folklóriko i kuminda i bebida tradishonal. Durante e selebrashon e gruponan ta trese kantonan improvisá ku promesanan na e santunan mas prominente den e bida religioso di Madeirensenan. Ta un selebrashon ku ta tuma lugá den tur e lugánan mas konosí di Madeira manera Funchal, Calheta, Lameiros, Porto Santo i São Vicente.

Un grupo di boluntarionan yu di Kòrsou ku roots na Madeira a uni forsa pa trese e grandioso selebrashon aki Kòrsou den gran forma! E Fiesta di Arraial na Kòrsou lo no solamente trese e ambiente asina típiko pa pueblo di Kòrsou por disfrutá, pero e fiesta aki lo konta ku presensia di artistanan spesial invitá manera:

  • Miguel Pires i su Trio
  • Grupo Folklóriko Portugues di Kòrsou
  • Grupo Folklóriko di Kòrsou Strea Briando
  • Kor Rejoice in Him
  • Antionio Vieira i su banda musikal

I pa kompletá e totalidat mas ku klaro lo tin spesialidatnan Madeirense na benta manera espetadas, bolo do caco, tremosos, carne de vinha d’alhos i mas. 

Tur fondo rekoudá durante e selebrashon aki lo bai pa parokia di Suffisant. Produkshon di e tremendo show aki lo ta den e man di Massive Productions! Maestronan di seremonia lo ta Maria Esther, konosí na Radio, i Maurilhio Nobrega Jr, konosí entre otro na televishon.

Nos no ke keda sin manda un palabra di gratitut na nos spònsernan manera Maduro and Curiel’s Bank, Licores Maduro,Distribier,Leañez,Hector Henriques,Pieters import, Fraal Agencies, Curacao Bottling Company, Satex, Jetair, Kortijn ijs, Lovers, Atlas Insurance, Heavy Mix, Mangusa Supermarket, Esperamos Supermarket, Goisco, Centrum Supermarket, Bon Bini Supermarket, Selikor N.V., Espetada House i Famia de Freitas ku a yuda nos di un forma grandioso pa hasi e fiesta aki posibel.

E Fiesta di Arraial, diamars 11 di Oktober 2022 lo kuminsá 6or PM di atardi ku un Santu Sakrifisio di Misa na Parokia di Suffisant pa despues, di 7or PM pa 11or PM, huntu nos selebrá e fiesta aki riba plenchi di Parokia di Suffisant. Pueblo di Kòrsou ta kordialmente invitá pa bin selebrá huntu ku nos!

Athunto un potrèt di Dr. Miguel Albuquerque, Presidente di Gobièrnu Regional di Madeira 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: