Ansary a pèrdè kaso: Mullet Bay ta di Ennia

WILLEMSTAD/PHILIPSBURG – Den kuadro di restrukturashon di Ennia, Centrale Bank van
Curaçao en Sint Maarten (CBCS), aktuando na nòmber di Ennia Caribe Investments B.V. (ECI), a
baha Ansary komo direktor di SunResorts i a nombra dos direktor nobo na su lugá. Sun Resorts
ta un empresa filial di ECI i doño di Mullet Bay na Sint Maarten, ku ta un di e propiedatnan
importante di Ennia.
Ansary a purba di blòkia su retiro for di SunResorts i nombra Palm i Derby komo kodirektor,
alegando ku na niun momento e traspaso di SunResorts pa e grupo Ennia no tabatin balides
legal. E ponensia ei ta totalmente kontrario na loke Ansary mes a bisa bes tras bes. Diferente
informe anual i e registro di akshonista di SunResorts tambe ta kontradesí esei.
Meskos ku a sosodé den e otro kasonan entre Ennia i Ansary c.s., awe korte a dikta fayo kontra
Ansary c.s., sentensiando konforme tur e demandanan di CBCS. Ansary, Palm i Derby ta prohibí
di presentá nan mes komo direktor di SunResorts bou di pena di multa kuantioso di te USD
10.000.000 pa kada prohibishon.
E direktornan nobo nombrá pa CBCS, Mike Alexander i Geomaly Martes, tin e tarea di trese òrdu
na SunResorts i inisiá un trayekto pa benta i/òf desaroyo di Mullet Bay. E entrada generá di e
manera ei lo ta na benefisio di e doñonan di pólisa di Ennia.
Willemstad, 7 di òktober 2022
CENTRALE BANK VAN CURAÇAO EN SINT MAARTEN