E APP CURACAO 311 A KEDA OFISIALMENTE LANSÁ …un plataforma pa tur siudadano pa asina komunidat kompletu por partisipá den kuido di nos isla…

E APP CURACAO 311 A KEDA OFISIALMENTE LANSÁ
…un plataforma pa tur siudadano pa asina komunidat kompletu por partisipá den kuido di nos isla…

WILLEMSTAD, 18 Novèmber 2019 – E app di Curaçao 311 ta awor ofisialmente lansá. E plataforma a wòrdu kreá dor di siudanonan pa siudadanonan pa asina komunidat kompletu partisipá den kuido di nos isla. E plataforma Curaçao a wòrdu rekonosé resientemente ku e Curaçao Innovation Award 2019 otorgá pa CITI. Hasiendo uso di teknologia, nos por awor pone mas atenshon riba situashonnan diario riba nos isla i kolektá informashon balioso pa asina atendé e situashonnan aki na un manera mas lihé i efektivo.

E konsepto 311 ta wòrdu usa mundialmente pa indiká problemanan ku no ta urgente. E plataforma 311 ta brinda siudadanonan e posibilidat di raportá problemanan di diferente kategoria, manera por ehèmpel buraku den kaminda, shushi kantu di kaminda, produktonan kaduká, pipa di awa of waya di koriente kibrá, difikultat ku aksesibilidat, daño na infrastruktura di trafiko, dùmpmentu di shushi ílegal i hopi mas. Ku e app aki, e usuario por saka un potrèt, e app ta kue e ‘geo-location’ di e problema, e usuario ta entregá un raportahe ku ta wòrdu outomátikamente publiká riba www.curacao311.com, na unda por tuma nota di un mapa ku tur raportahe. E usuario por skohé pa keda kompletamente anónimo.

E meta prinsipal ta di krea un sentido di partisipashon i responsabilidat sosial. Siudadanonan por ta awor e wowonan i oreanan di instansianan konserní i bira asina parti di e solushon. Instansianan por risibi datos al momentu krea pa públiko ku ta yuda nan yega na maneho i solushonnan mas efisiente. Kolaborashon ta di krusial importansia pa logra e vishon aki i pesei esfuersonan ta wòrdu hasí pa e plataforma konektá ku tur instansia, tantu den sektor privá komo den sektor públiko.

MEO ta e promé ministerio pa sostené tal kolaborashon. Durante e evento di lansamentu, Minister di Desaroyo Ekonómiko Giselle Mc William a firmá un akuerdo di kolaborashon ku Smart Mobility Caribbean Foundation, kual ta e kreadornan di e Curaçao 311 app. MEO lo risibí akseso na un dashboard kaminda tur raportahe tokanto e kategoria di produktonan kaduká por wòrdu analisa pa asina akshon mas efektivo i efisiente por wòrdu tumá tokante e problematika aki.

Awor ta di sumo importansia pa komunidat kompletu yuda karga e app i e kousa ku tin su tras. Por fabor buska ‘Curaçao 311’ riba Google Play i tambe Apple su app store, download e app i hasi mas tantu raportahe posibel. Si nos no kuida nos isla, ta ken lo kuid’é pa nos? Ta nos kada un su responsabilidat pa yuda kuida nos bunita isla.

Smart Mobility Caribbean Foundation kier a gradisí CITI, MEO, VVRP, Bureau Telecommunicatie & Post i tambe Fundashon Alton Paas pa nan sosten i pa kere den e kousa aki.

This site uses Akismet to reduce spam. Learn how your comment data is processed.

%d bloggers like this: