E PROMÉ EDISHON DI ‘GIRLS MEET SOCCER 2022’ TABATA UN ÉKSITO!

E PROMÉ EDISHON DI ‘GIRLS MEET SOCCER 2022’ TABATA UN ÉKSITO!

 

 

Djadumingu 16 òktober último FFK a organisá e promé edishon di ‘Girls meet Soccer 2022’.

E aktividat aki a tuma lugá den Stadion Rignaal ‘Jean’ Francisca di 4’or di atardi pa 8’or di anochi. Riba e dia aki alredor di 30 damita a partisipá na e evento aki i a sera konosí mas di aserka ku futbòl femenino. Nan a haña e oportunidat pa praktiká ku bala i a hasi diferente ehersisio ku a keda duná pa Heinrich Roojer i Sterre Noordhoek.

E 10 klupnan ku ta partisipá den nos Kampionato Femenino tambe ta tei presente pa duna informashon na tur mayor i e damitanan ku a asistí. Tur ku tabata deseá di forma parti di un ekipo por a inskribí serka un di e ekiponan p’asina forma parti di nos kampionato.

 

Aparte di esaki, e hungadónan áktivo den Kampionato Femenino kategoria U-15 ta tin algun enkuentro komo parti di un torneo di ‘warm-up’ ku Komishon Femenino a organisá pa kuminsá prepará pa e inisio di Kampionato Femenino 2022-2023. Despues di e partidonan di U-15 i e evento di ‘Girls meet Soccer 2022’, e entrenadónan di e ekiponan femenino ta tin un partido amistoso kontra otro pa mustra un i tur kiko nan tin aden.

 

E meta di e ‘Girls Meet Soccer 2022’ tabata pa hasi futbòl mas atraktivo i hisa e interes serka nos damanan pa despues nan djòin un ekipo femenino i yuda engrandesé futbòl femenino aki na Kòrsou. FFK por mira bèk riba un atardi bai kue anochi eksitoso kaminda nos damanan por a konosé mas di futbòl, forma parti di un ekipo i asina kompetí den nos Kampionato Femenino.

 

FFK i Komishon Femenino ta gradisí tur ku a asistí i por spera riba e di 2 edishon di Girls Meet Soccer ku lo ta aun mas grandi.

 

19 òktober 2022

 

 

 

 

 

 

 

 

 

 

 

 

 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: